مية سنه مستقبل
تخيل معايا أنك دخلت تنام وصحيت الصبح لقي النتيجة مقدمة 100 سنة حاجة بسيطة .. نزلت الشارع زي المجنون سألت أول واحد قابلك قالك أحنا في سنه ألفين ميه وسبعة
لو تحب تسأله سؤال عن المستقبل ياتري يكون أية ؟؟
وتتخيل أية حتكون أجابته
اللي يحب يجاوب علي السؤال في التعليقات أهلا وسهلا
اللي يحب يجاوب في مدونته برضة أهلا وسهلا بس يقولي أنه جاوب
اللي يحب ميجاوبش خالص برضة أهلا وسهلا بس بعد أسبوع من دلوقتي حنختار أجمل أجابة
وهدية قيمة للفائز باكو شيكولاته وأنا عارف معظمكم أطفال وبتحبوا الشيكولاتة
يلا قولولي رأيكم
19 comments:
السلام عليكم ورحمة الله وبركاته
دكتور سكتم ايه الاسئله المحرجه دي بس
هو في الغالب هايبقي سؤال اي واحد طبيعي مين اللي بيحكمنا دلوقت
والاجابه اكيد معروفه ، اكيد هايكون واحد من السلاله المباركه
اللي فات ده كان سؤال العالم الطبيعيه
اما سؤالي الشخصي فهو :
مين اللي خد الدوري السنه دي ؟؟؟
والاجابة : الاهلي طبعا .....ودي محتاجه سؤال ..؟؟؟.....ههههه
تحياتي
حقيقة يا دكتور أول سؤال أسأله حيكون عدة اسئلة
كلها عن علامات الساعة ما تحقق منها ومالم يتحقق
هذا إن لم تكن الساعة قد قامت
ميه سنة مرة واحدة يا دكتور
س 1 احنا فى سنة كام لازم اتاكدت ربما يكون هلاوس
ج 1 هيقولوا انتى مجنونة احنا 2107
س2 ايه الجديد عندكو
ج2 انيهار امريكا وصعود مصر لقيادة العالم وذلك بعد هزيمتها فى العراق وايران واقامة دولة فلسطين
س3 مين حكام مصر
ج 3 مش عارفيين فى ناس بيقولوا انه حفيد عمر بن الخطاب رضى الله عنه وفى ناس بتقول حفيد عمر بن عبد العزيز وفى ناس بتقول حفيد صلاح الدين وفى ناس بتقول حفيد قطز
يلا هات الشيكولاته ياريت ميكونش كادبورى علشان المقاطعة
خمسة فضفضة سألت اول سؤال جه فى بالى فقلت افكر فى غيره ، لقيت عصفور المدينه سأل تانى سؤال جه فى بالى
وملقتش حاجه تانى اسألها
بما انى باحب المسابقات
يبقى اول سؤال حاسأله هو مين اللى اخد باكو الشيكولاتة بتاع سكتم بكتم؟
مية سنة وسؤال يناسب الفترة
مش هيفهمني اول واحد اقابلة لو علي الحال دة بعد مية سنة البلد مش هتكون لينا وطبيعي اول واحد هقابلة مش هيفهم لغتي هشوف اقرب مكان في ماء اشرب واتوضي واصلي وادعي ربنا يرحمني
يااااااااااااه
والله كنت هاكتب موضوع زي ده
بس الفكرة بتاعتي اني كنت بظبط التذكير بتاع الموبايل
فقلت اجيب سنة كده
جت2097
فضلت ساعة متنح
الغيب في علم الله
تحياتي علي الموضوع
حلال عليك
اظن انى هلاقى الناس وقفه للحساب ومنتظره دورها لان بصراحه الدنيا كدة خلاص بدأت فى النهايه
هسأله
هو ايه اللي حصل زمان؟
مين اللي مسك الحكم بعد حسني مبارك؟
هو مين اللي بيحكمنا دلوقتي من ال مبارك؟
هو رئيس مجلس الشعب دلوقتي اسمه ايه سرور؟
هي امريكا لسة ماحتلتش ايه من اراضي المسلمين؟
وكفاية بقى والنبي علشان اعصابي مش مستحملة
تحياتي ليك
هو لسة فية طوابير عيش عندكم
الاجابة يعنى اية عيش دة حاجة بتتشرب ولا بتتلبس
هساله البنزين دلوقتى اللتر بكام
ولا باه فيه وقود بديل؟؟
يعني كل واحد ما صدق يعرف اجابة اسئلته الحاليه
المفروض ان احنا ولاد النهارده
يعني انا اول حاجه هاسأل عليها هي
لو سمحت انا بدور على شغل الاقي فين؟؟؟
وطبعا حسك عينك تدي الشيكولاته لحد غيري
سلاااااااااااااااااااااااااااااام
الله يخليك يا عم ابقى اديني الشيكولاته ولو انا مكسبتش ابقى قول للي كسب يديني حته
سلاااااااااااااااااااااام
السلام عليكم
انا هسأل: القدس رجعت
الاجابة: هيه فين القدس دي
ومستني باكو الشيكولاته على الايميل
ياه يا د/سكتم 100 سنه ياريت هاقول هو انا لسه عايشه هو كيلو اللحمه وصل كام
ستات بقى هههههههههههههه
لا بجد اول سؤال هاقول هو لسه فى بركه) (; فى البلد يا اولاد؟)
مع تحياتى لزيارتك لمدونتى
1-هل ستعلق لوحة معدنية علي بوابات القاهرة مكتوب عليها
أسفين كامل العدد
2-هل سترفع شرم الشيخ أعلام الأستقلال وتدخلها بجواز سفر تابع للأتحاد الأوربي
3-جسر يربط دهب بتل أبيب لتسهيل السياحة
4-الأهلي بطل القرنين
ومحاولات لشراء القرن الثالث
لالالا مش عايزة افكر ولااتخيل حتى
ده احنا مش عارفين نعيش فى 2007 نقوم نفكر فى 2107؟؟؟؟؟؟
لالا ده ظلم وربنا مايرضاش بالظلم
اما بالنوسبة للشيكولاتة فكاميكاز لن يسمح انها تروح لحد غيره اصلااااااااا
عشان محدش يحلم بيها وكدة
سلام
حلو موضوعك ياسكتم بوكتوم :)
أول سؤال ها اساله ياسيدى امممممممممم
هوه انا نمت 100 سنة ليه؟
ايه السبب يعنى ؟
سؤال منطقى صح ..
هوه غريب انى اتعامل مع فكرتك الغير منطقية بشكل منطقى ..
بس مش عارفه ليه حاسة انه انا نمت 100 سنة وصحيت ..وده السؤال اللى هاارزعه ..
Post a Comment