سلمي بماذا تفكرين..سلمي بماذا تحلمين

إلي كل سلمي حزينة وإلي كل سالم حزين قفوا قليلا علي كل بيت من الأبيات التالية وتأملوا المعني
وأخبروني بماذا تفكرون ؟ وبماذا تحلمون ؟

السحــــــب تركض في الفضاء الرحب ركض الخائفين
والشمــــــــــــــــــس تـــــــــــبـــــــدو خلفها صفراء عاصبة الجبين
والبحـــــــــــــــــــــر ساجٍ صامـــــــــــــــــتٌ فيه خشوع الزاهدين
لكنما عـــــــــيناك باهتتان في الأفـــــــــــــــــــــق البعـــــــــــــيد

سلمى ...بماذا تفكرين؟
سلمى ...بماذا تحلميـــــــن؟

فاصغي إلى صـــــــــوت الجداول جارياتٍ في السفوح

واســــــتنشـــــــــقي الأزهار في الجنات مادامت تفوح

وتمتعي بالشــــــــــــــهـــــب في الأفلاك مادامتْ تلوح

من قــــــبل أن يأتي زمان كالضـــــــــــــباب أو الدخان

لا تبصرين به الغــدير

ولا يلـــــــذُّ لك الخريرْ

مـــات النهار ابن الصباح فلا تقـــــــــــــــولي كيف مات

إن التــــــــــــــــأمل في الحــــــــــياة يزيد إيمـــــــــــــان الفتاة

فدعي الكآبة والأسى واســـــــــــــــــترجعي مرح الفتاةْ

قد كان وجهك في الضحى مثل الضحى متهـــــــــــــللاً

فيه البشـــــاشة والبهاءْ

ليكن كــذلك في المساءْ

ايليا ابو ماضي

ومازال الكتكوت يعيش في الصندوق

ولد الكتكوت وخرج إلي الحياة ليجد نفسة في الصندوق
رأي الصندوق واسعا كل الأتساع أحس بالوحدة والفراغ
رأي أخوتة من حوله يلعبون ويمرحون لم يكن مثلهم يمرح ويلعب بل كان يحلم أن يكبر ليملأ الصندوق
وكبر الكتكوت ومن جديد أحس بالفراغ يملأ الصندوق وأحس الوحشة والوحدة
رأي الكتكوت حبيبته الكتكوتة عشقها من القلب والرئتين عشقا ملأ الصندوق
تقدم لأبيها الديك وبعد تمحيص وتفحيص رفضه الديك فما معه من الحب كثير ومن الحب قليل لا يكفي أبدا لشراء صندوق
ترك الكتكوتة كسيرة الفؤاد وقرر أن يغادر الصندوق بعد أن رأي الصندوق علية ضيق
ولصيق
ولكن ترك الصندوق ليس كدخول الصندوق
وبعد معاناة وضيق قرر أن يتزوج بأي كتكوتة ترضي بظروفه ككتكوت
وتزوج وأنجب من الأولاد ست كتاكيت كلهم يريد حبا وخبزا ليكبروا ويذوق منهم الذل والعقوق
والعيش في الصندوق يضيق ويضيق
وتمني أن يعود طفلا يلهو في الصندوق
و في الصندوق تغيرت الأخلاق وأستحلت الحرمات وضيعت الحقوق
ومازال الصندوق يضيق . أحس أنه الأن يملأ الصندوق وأحس أنه في الصندوق مخنوق
ذهب إلي كتكوت الحكيم
وقال له : أخبرني يا حكيم الزمان كيف السبيل لترك الصندوق وما هو المصير بعد حياة الصندوق ؟
قال الحكيم: يابني أن مصير كل حي هوالموت فإذا أنت مت دفنت
قال الكتكوت : وأين أدفن إذا مت يا حكيمنا الكتكوت ؟
قال الحكيم : في الصندوق ياصغيري في الصندوق

ومازال الكتكوت حتي الأن يعيش في الصندوق

وفي أنفسكم

القلب ..ذلك العضو الحيوي في جسمي وجسمك..القلب اللذي ألصقنا به تهمة الشعور والإحساس وهو منهم برئ
سألت نفسك قبل كدة .كيف يعمل ؟؟
تعالوا نستعرض شوية حقائق في الأول عن هذا الإبداع والفن في الخلقة التي أراد الله أن يبهرنا بة

أولا معلومة غريبة القلب هو عضلة زي عضلات الساعد والساقين ولكن الله جعلة لحكمة جليلة عضلة لا إرادية
تخيل معي لو أن القلب عضلة إرادية وقتها لن تفعل شئ إلا أن تفكر في قلبك وتأمره أن يعمل ليل نهار ..وأنت تأكل تحركة إراديا وأنت تتكلم تحركة إراديا والمصيبة أنك لن تنام وكيف تنام وتوقف قلبك!! أن الله بنا رحيم أرق الرحمة فقد كفلنا مؤنة تحريك أجسامنا وتغذية أعضائنا

ثانيا تكوين القلب : القلب كما نعلم مكون من أذينين لإستقبال الدم وبطينين لضخ الدم.. معلومات قديمة.. البطينين أغلظ وأسمك جدارا فهما المسؤلان عن ضخ الدم لكل الجسم..ولا تستهين بهذا تخيل معي أن الدم يجب أن يصل إلا كل جزور شعرة وكل منبت ظفر علي مدار24 ساعة وإلا مات هذا الجزء وهناك بعض الأعضاء كالمخ لاتتحمل جوع الدم أكثر من 3 دقائق تخيل!!

ثالثا عمل القلب :تخيل أنك تحمل في قلبك مضخة تعمل من 60 إلي 90 مرة في الدقيقة 60 دقيقة في الساعة 24 ساعة في اليوم 365 يوم في السنة 60 سنة أوأكثر في حياتك ولو وقف ثواني معدودة تموت..
وياريت بتضخ مية كانت تبقي سهلة إنما بتضخ أية دم كامل يعني كرات دم أشي بيضة وأشي حمرا وصفائح دموية وبلازما لزجة وأوكسجين وغذاءوبلاوي متلتلة
وأكيد أخوانا المهندسين يقولولنا أكتر أنه كلما زادت اللزوجة قلت سرعة السائل وأحتاج لقوة ضخ أكبر
العجيب والمذهل في الموضوع أن كل دة بيحصل وسعادتك نايم في العسل نوم يعني لاسامع صوت المضخة ولا محسساك بتعب ولا حتي ليك تحكم فيها..إبداع المبدع الأكبر عز وجل
والأغرب أن سرعة وقوة حركة المضخة بتتغير من وقت للتاني يعني وأنت ماشي غير وأنت نايم غير وأنت بتتعارك غير لما تشوف حبيبتك
كل مؤثر لية تأثيرة بدرجة معروفة ومتصل بشبكة من الأعصاب اللا إرادية اللي بتظبط الشغل علي أد الحاجة بالضبط..والموضوع كله كهربا جوة أسلاك وأليكترونات وأيونات موجبة وسالبة بتسري في العضلات والأعصاب ..وسعادتك برضه نايم في العسل

الموضوع بصراحة معقد جدا حتي علينا نحن الأطباء ..وكان عمل القلب في مادة الفسيولوجيا من أصعب وأمتع الكتب في الوقت نفسة
ياتري أزاي بتتغذي المضخة دي؟؟
ياتري لية في بعض الأوقات بنحس بنبضات القلب؟؟
يعني أية فشل بعضلة القلب؟؟
يعني أية قصور الشرايين التاجية؟؟
ياتري لية ربط الناس وحتي ربنا سبحانة وتعالي في القرأن بين القلب والأحساس والأعمال الصالحة؟
أسئلة عايزة سنين وسنين للإجابة يمكن في بوست تاني أن شاء الله


ملحوظة : الكلام اللي فات ده لايعتبر بحال من الأحوال محاولة لشرح طريقة عمل القلب أو تركيبة لكنها محاولة طفل صغير مبهور رأي هرما ضخما فتحسس قاعدتة في أفتتان
وتضائل بجانبة وتذكر غرورة..فبكي..
وأراد منكم أن تتذكروا عظمة المبدع.

"إن في ذلك لعبرة لمن كان له قلب أو ألقى السمع وهو شهيد"

فهل لك قلب؟

الطفل المغرور
سكتم بكتم

تاجي وأنا حر فيه..تاجي أنشره وأكويه

وصل لنا هذا التاج من صديق البرنامج الدائم عصفور المدينة..اللي أهدي التاج بتاعه لنص المدونين..ربنا يكرمه ونردها له يوم فرح بناته إن شاء الله

اسم مدونتك
أنظر أعلي الصفحة

لماذا اخترته ..وماهي نيتك من وراء اختياره؟
الأسم يعني الصمت وعدم الأفصاح عن رأيك .في الحقيقة لما قرأت بعض المدونات في البداية حسيت أن الناس دي كتاب عباقرة وأنا حروح جنبهم فين فقولت يبقالي أسم أعلق بيه من غير ماأكتب
لكن معرفش أية اللي حصل وعدوي الكتابة أتنقلتلي..أنتم السبب

هل فكرت في إغلاق مدونتك؟ والسبب؟
نعم مرة واحدة .والسبب أني حسيت أن معنديش جديد.وأني لو كتبت حكتب لمجرد الوجود وخلاص.لكن تراجعت خوفا علي زعلكم

صورتك في المدونة ورمزيتها ؟؟
الصورة رأس رجل فمه مغلق بالسوستة أظن واضح ليية

لماذا دخلت عالم التدوين من الاساس؟
زي ما قلت دخلت علشان أعلق فقط .وبعدين العدوي أشتغلت.طبعا أول من عرفني بالمدونات هو صديقي الأنتيخ ماعلينا
ومكانش عايز يقولي أسم مدونته لغاية معرفتة لواحدي بالصدفة

جمله قيلت لك فى وصف مدونتك؟
واحد قالي أية المدونة الهس هس دي . فقلت له ربنا يهس مقدارك

التعليقات بالنسبه لك ,اهميتها؟
شعوري عندما أجد تعليقا جديدا هو شعور العريس إذا وجد أصدقاءه يدخلون فرحه واحدا بعد الأخر.فلا يجد غير الترحيب والعرفان بالجميل
فأن تجد من علي أستعداد أن يقضي وقتة بين كلماتك البسيطة ثم يناقشك فيها ولربما شكرك ولربما أستمتع
عندها تحس أنك لست كما مهملا .وبل وربما تكون مهما..تخيل

احلى بوست كتبته ...ضع اللينك , ثم اذكر لماذا؟
في رأيي الشخصي هو بوست الرجل القوي لأني شفت القصة بعيني وتأثرت بيها فعلا و دمعت لها عينايا

أفضل بوست قرأته؟ وضع لينكه؟
بصراحة حنقي بوست فرفوش ونعنوش زي صاحبته اللي حاسس أنها مكتئبة شوية اليومين دول ربنا يفرج كربها ويسعد أيامها كما أضحكتني كثيرا بهذا البوست
شوفتوني لما هيست ؟؟ لإنسانة

أفضل مدونة قرأتها؟
بصراحة مدونة الواد صديقي اللدود هي أفضل المدونات عندي بس محدش يقوله الكلام ده مش ناقص منه نفخه كدابة
ثم مدونة الأستاذ عصفور المدينة حقيقي راجل متجدد فاهم ورزين من الأخر راجل حكيم ربنا يكرمه

حد قل أدبه فى التعليق إيه رد فعلك؟
يعني واحد رد قبل كده بطريقة فجه إن عبرت عن شئ فعلي إفتقاده الفطنة والكياسة في التعبير
وممسحتش تعليقه بس أديته اللي فية النصيب

أسوأ مدونة؟
الحقيقة مبدخلش مدونة سيئة مرتين علشان كدة بنساهم

هيحصل ايه لإيميلك لما تموت ؟؟
متخافوش علي الأيميل أنا علمته أحسن علام وكبرته وربيته لحد مبقي ماشاء الله طولي أهه
متهيألي لما أموت حيجري علي معاشي.. وبعدين ينساني خالص

اديت الباسوورد لحد قبل كده؟
لسكتم بكتم

كانت إيه طبيعة علاقتك بيه؟
كويسة الحمد لله تقريبا أنا وهو واحد

اسمك؟
سكتم بكتم

المشهور بيه وسط اصحابك؟
سكتومون..سكتموفيتش ..أبو السكاتم

شخصيتك نوعها إيه؟
توشيبا 21 بوصة..وساعات إيديال 16 قدم

السفر بالنسبة لك؟
حلم أخاف أن يتحول لكابوس

وقت فراغك بتعمل فيه إيه؟
كمبيوتر ونت ثم كمبيوتر ونت ثم كتاب

المود بتاعك؟
سايلنت مود

الاكلة المفضلة؟
مكرونة بالبشامل وفراخ مشوية كويس

الصفات اللي أخدتها من بابا؟
السياسة

الصفات التي أخدتها من ماما ؟
العند

اكتر ست حاجات بكرهها؟
الغرور ..اليهود..الكوسة..الإستهتار..السبانخ..مايكروسوفت

اكتر ست حاجات بحبها؟
الله ورسوله..أمي وأبي..أخوتي وأصدقائي

الشغل بالنسبة لك؟
كرامتي

الانترنت بالنسبه لك؟
الإدمان اللذي لا أريد أن أتخلي عنه

متهيألي التاج ده أتمرر علي الكل بس حأكد تمريره لأتنين بالتحديد

الباشمهندس ماعلينا

والأستاذة الإنسانه

ويجعله عامر

مسألة حسابية واقعية

مهندس شاب حديث التخرج 27 عاما عين في الحي بمرتب شهري 375 جنيها مصريا شاملا الحوافز والبدلات.
وهو ما يعتبر مرتبا ضخما بالنسبة لأقرانه من الشباب

يدفع شهريا 100 جنية مساهمة في مصروفات البيت حيث مازال يعيش مع والدته وعلي معاش أبية المتوفي
60 جنية مواصلات
30 جنية كرت شحن
30 جنية إيجار وصلة النت
25 جنية إيجار الشقة
100 جنية مصروفه الشخصي من أكل وشرب في العمل .بالأضافة إلي الأشياء البسيطة اللتي لايمكن أن يطلبها من والدتة.

ذهب هذا الشاب ليتقدم لخطبة حبيبته .طلب منه والدها شقة عادية متوسطة وشبكة ومهر في حدود المعقول
فإذا كان ثمن الشقة العادية المتوسطة 120 ألف جنية
وثمن المهر والشبكة اللي في حدود المعقول 20 ألف جنية

فأحسب أيها الطالب النجيب كم سنة يحتاجها هذا الشاب ليبدأ في أستحلال الرشوة ؟؟

لعبة الورق

جلست أمامة علي هذة المائدة المستديرة ستون عاما نلعب الورق
ستون عاما وأنا أتحمل إضاءة الغرفة الخافتة وفرش المائدة الأحمر وصمته الدائم
ستون عاما وأنا أراه بعباءته السوداء كالليل وعيونة القوية النافذة وإبتسامتة الساخرة اللامبالية
ستون عاما وأنا أربح.. دائما أربح.. ودائما يبتسم بركن فمه في إستهزاء وعدم أكتراث

في العشرين تعرفت علي هذة الفتاة الساذجة في الجامعة أحبتني وسلمتني نفسها ..وما ذنبي أن كانت هي ساذجة ..طبعا تخلصت منها ..في بطنها طفلي ..وماذنبي أنا..تقتل نفسها وتموت ولا يعرف أحد بقصتنا

أرجع إلية مسرعا فأجلس علي المائدة أعد أوراقي.. الصحة والشباب و الجمال...وأربح الجولة فأنا دائما أربح ودائما يبتسم

في الثلاثين أتعرف علي ذلك المقاول يقول لي هدية بسيطة فأقبلها وأزداد غني وأجعلة يربح المزاد..صفقة مهربة وأزداد غني..إحتكار سلعة وأزداد غني

أعود إلية وكلي ثقة.. أجلس علي المائدة فمعي ورقة رابحة وأعيد عد أوراقي ..الأن معي المال والصحة ..الأن أربح وهو يبتسم

في الأربعين تزوجت فلانة بنت فلان سليلة المجد والحسب..ولما لا فمعي المال ..أحببتها؟.. بالطبع لا..لقد فقدت أحساس الحب منذ زمن أوربما لم يكن موجودا لدي أصلا

أعود إلية الأن قد صار معي المال والصحة والحسب والنسب ..الأن أربح ومازال يبتسم

في الخمسين أتقلد ذلك المنصب المهم..كيف حدث هذا ..قليل من الرشوة وقليل من الوساطة وقليل من خيانة الأمانة يتم كل شئ ..يأتي لي الفقراء يشتكون فأصم أذني وأغمض عيني مالي أنا وكل هذه الشكوي..يأتي لي فلان بك فأقضي له مصالحة ويزداد نفوذي وتزداد ثروتي

أعود إلية وهو مازال جالسا في أنتظاري.. إن المكسب محقق وبالفعل أربح وأقهقه من الفرحة أما هو فيبتسم فقط يبتسم

في الستين يبلغ نفوذي حدا لا مثيل لة أنا المتحكم في حياتي أنا المتحكم في مصيري ومصير كل من حولي..أبناء فا سدين لا يهم فلم أجد الوقت الكافي لأربيهم ألا يكفي أني كنت أجمع لهم المال...مكروه ممن حولي لا يهم فالقوي دائما مكروه

أعود إلية لأجده في مكانه ينتظرني الأن أنا في قمة مجدي وعظمة سلطاني لايمكن إلا أن أربح فمعي كل الأوراق معي كل ما أحتاجة علي مائدة الدنيا الحمراء..المال والصحة والسلطة والحسب والنسب..نظرت إلي أوراقي لقد تعبت في جمعهم وضحيت بالكثير من أجل أن أربح وها أنا أربح فهل أنا سعيد؟..لا أعرف

أفقت من أحلامي علي صوته يضحك ويقهقه و في يدة ورقة واحدة ورقة سوداء
ولأول مرة يتكلم ويقول: الأن تخسر
وألقي بورقته الوحيدة اللتي كتب عليها

... الموت ...

وعرفت أنني كنت أخسر منذ بدأت أن ألعب وعرفت سر أبتسامتة فهو دائما يربح في النهاية

مفيش فايدة

سيبوها تموت خلاص مفيش فايدة

هكذا قالها الطبيب المقيم بذلك المستشفي العام الكبير
هل هي قسوة قلب صنعتها أيام من العمل الشاق في هذا المجال . أم أن هذة القسوة هي جزء من شخصيته
هكذا قالت له خطيبتة السابقة عندما تشاجرا.. أنك قاسي قاسي جدا

لنعرف الحقيقة لنعود إلي الوراء بالزمن مدة ساعة واحدة فقط

سيارة الأجرة تتوقف أمام بوابة المستشفي بداخلها ذلك الطبيب الشاب و بجواره خطيبته والصمت يخيم عليهما
هي تخلع خاتم الخطبه من يدها وتخلع معها جزء من قلبها لتضعه في يدة

هي : مفيش فايدة يا حاتم بابا مصمم وأنت مخدتش أي خطوة إيجابية.. بابا مش عاجباه الشقة وأنا مقدرش أعارضه

حاتم : بالسهولة دي يبقي خلاص مفيش فايدة لو مش حتقفي جنبي يبقي مفيش فايدة

هي : أنا أسفه

حاتم : وأنا كمان

ينزل حاتم من سيارة الأجرة ويتجه للمستشفي قدماه لا تكاد تحملانه قلبه يدمي وروحه تتمزق خسارة لقد أحبها فعلا
يدخل الأستقبال ويتسلم العمل

صوت سيارة الأسعاف مسرعة تولول علي من ماتوا ومن سيموتوا بدا له صوتها اليوم كئيبا مقبضا لا يحتمل
المسعف يدفع بالسرير المتحرك وعلية أمرأة في الخمسين من عمرها فاقدة الوعي وفي حالة من نوبات الصرع العنيفة وخلفها زوجها يبكي كما الأطفال في حالة يرثي لها

الزوج مخاطبا حاتم في هلع :ألحقني يا دكتور مراتي أم بناتي دأنا مليش غيرها مين حيربي البنات من بعدها .ألحقني يا بيه أبوس أيديك

حاتم : أهدي يا بابا خلينا نشوف شغلنا حد يطلع الراجل ده بره

من نظره سريعه تبين له حقيقة الحالة ..الموقف لا يحتمل وكل دقيقة من التشنجات تحمل خطورة بالغة علي خلايا المخ

حاتم مناديا الممرضة :جهاز الضغط بسرعه

الممرضة تحضر جهاز الضغط بسرعة فقط ليكتشف حاتم أنه لا يعمل

حاتم ثائرا :أية ده عايز جهاز ضغط شغال حرام عليكم

الممرضة :ماأنت عارف يادكتور حاتم هو ده الجهاز الموجود عندنا أمكانيات المستشفي كدة

حاتم :أعوذ بالله قلنا ميت ألف مرة يصلحوه .. طيب أسحبوا عينة غازات بالدم بسرعة

الممرضة :مش شغال النهاردة يادكتور حاتم أصل الفني أجازة وقافل علي الجهاز في المعمل

حاتم :حرام عليكم طيب أنا أشتغل أزاي

وقام بتركيب خط وريدي حاول أولا بالدواء التقليدي اللذي لم يفلح أن يوقف التشنجات
طلب من الممرضة علاجا يعرف مسبقا أنه غير موجود

الممرضة :ما أنت عارف يادكتور مش موجود أحنا في أخر السنة المالية والطلبية الجديدة لسة موصلتش

هنا كان الضغط علي أعصابه لا يحتمل ..أنفجر بالصراخ في الجميع
حاتم : حرام عليكم يا بني أدمين.. والله ده كفر..أبعتوا الأهل يشتروا الدوا بسرعة

الممرضة: بس يادكتور أنت عارف ده غالي جدا وهم شكلهم ناس غلابه

حاتم صائحا في قمة الغضب :خلاص سيبوها تموت خلاص مفيش فايدة

يخلع القفازات الطبية ويترك المريضة وهي في حالة التشنجات ويتجه لغرفتة
يغلق الباب ويبكي ..يبكي بحرقه وحرارة.. من سنوات لم ليبكي هكذا ..من سنوات وهو يعمل ليل نهار ليوفر ثمن الشقة اللذي لايكتمل أبدا .. من سنوات وهو يتمني ويحلم فقط ليكتشف كم كان مغفلا..كم كان غرا ساذجا .. أنه لا يملك حتي في جيبه في الوقت الحالي ثمن الدواء اللذي تحتاجة هذة المريضة تعسة الحظ اللتي قررت أن تصاب بنوبة صرع في أخر السنة المالية

نظر إلا الدبله في يده وقال لنفسه :خلاص ياحاتم مفيش فايدة

هنا خطرت له فكرة جفف دموعه وخرج من الغرفة مسرعا
ذهب إلي زوج المريضة أعطاه الدبلة في يده وورقة بأسم الدواء في اليد الأخري

حاتم : أسمع اللي حقولك عليه ونفذه بسرعة لو عايز تنقذ حياة مراتك ..خد الدبلة دي وبعها ... حتلاقي جواهرجي قريب من البوابة قوله بس دكتور حاتم عايز يبيع دي.. تاخد تمنها وتجيب الدوا ده بسرعة من الصيدلية اللي جنبه
نظر الرجل له مندهشا وأنطلق عدوا ينفذ ما طلب منه

حاتم يبدأ في أعطاء الدواء للمريضة
دقائق وتتوقف التشنجات
زوج المريضة يحتضن حاتم ويقبله
إبتسامه خفيفة ترتسم علي شفتي حاتم..وسعادة خجوله تتحسس طريقها إلي قلبه
وهو يقول لنفسه بصوت مسموع

الحمد لله الظاهر كدة والله أعلم أن فيه فايدة

أكتشف الأخطاء السبعة

سؤال برئ: ياتري لية السياحة مضروبة في مصر ؟؟

سؤال تاني برئ برضه :لية حوادث الطرق كتيرة في مصر ؟؟

أنتصار الشر

"the only thing necessary for the triumph of evil is for good men to do nothing "

Edmund Burke ( 1729-97)

الشئ الوحيد الضروري لإنتصار الشر هو ألا يفعل الرجال الخيرون شيئا

عواجيز الفرح

أنا واحد صاحبي معرفوش قاعدين نتكلم علي المسنجر قوم أية لقيت موضوع كدة عنوانه محاولات مستميتة لاحياء "سي السيد" في مصر قومت بعتله اللينك بتاعه

http://news.bbc.co.uk/hi/arabic/world_news/newsid_6257000/6257544.stm

خلاصة الموضوع أن بدأ يبقي فية في مصر جمعيات للمطالبة بحقوق الرجل وكفاية عليها المرأة بقي كدة بعد ما الراجل أتبهدل بهدلة وحشة قوي أتهامات وبهدلة في الأقسام والمحاكم وأخرتها ضرب كمان
قاموا الرجالة عملين جمعيات فعلية للمطالبة بحقوق الرجل
و قرأنا المقال ودار بيننا الحوار التالي

أنا : شفت ياخويا 38 بالمئة من الرجال في مصر يتعرضون للضرب من قبل زوجاتهم.

صاحبي اللي معرفوش : اه يا نا يا غلابة أحنا حنتجوز أزاي

أنا : لا يا عم أنا خايف

صاحبي : هههههههه ... أول حاجة لما تيجي تختار إنها تكون مسلوعة وقصيرة كده لا تعرف تضرب ولا تنيل

أنا : يعني أختارها صحتها علي أدها !!!

صاحبي : أيواااا

أنا : وعلي أية ياعمي مأحنا كدة مية فل وأربعتاشر

صاحبي : بس عشان الناس ما يقولوش علينا خايفين ولا حاجة

أنا : تفتكر

صاحبي : أيوة طبعا

أنا : طيب اتجوز أنت الأول أهو نجرب تلات أربع شهور كدة لو فضلت سليم أبقي أفكر أنا

صاحبي : طب حستنى شوية لما نشوف حينزل الصنف بتاع (أمييييييينة) ده ولا لأ عشان لو نزل ناخده مرة واحدة بدل ما نقعد نلبس ونقلع


أنا : ياريت والله الصنف دة كان مية مية.. لرايح فين ولا جاي منين.. ولا أن ليا رأي ولا حاجة

صاحبي :انا ما اقدرش اقول لك .. لأن بصراحة مشفتوش خاااااااااااااااالص

أنا : الله يخرب بيت التعليم اللي بوظ عقول البنات

صاحبي :ايوا يا خويا ..المشكلة إنهم لا بيتعلموا ولا نيلة يعني هي بحتتة الورقة دي تتنطط على الخلق وتقول لك بعد العلام ده كله حتقعدني في البيت اطبخ لك واغسلك أنت وولادك بلا نيلة اللي يشوف كده يقول اتعلمت في السوربون
أنا : تعرف أحنا عاملين كدة زي مين

صاحبي :زي مين

أنا : زي عواجيز الفرح أنا وأنت . عمالين نبكي علي أيام الزمن الجميل ومش عاجبنا الحال

صاحبي : أيوة فعلا . فاكر المبيت شو كان فيه اتنين عواجيز في البلكونة على طول(ستاتلر و ولدورف ) كانوا على طول مش عاجبهم حاجة كده ويتريقوا على كل حاجة ..أحنا دول

أنا : عندك حق أنا شايف كدة برضه


طبعا عايزين تعرفوا مين صاحبي دة .. لا ياجماعة مقدرش أقول دة أنا حتي معرفوش

ملحوظة : أرجوا من مدونات الجنس الناعم أنهم يمسكوا نفسهم في التعلقات وبلاش حدف طماطم حمضانة وبيض فاسد أرجوكوا المدونة مش ناقصة وتذكروا أن أنتوا الجنس الناعم وأن أحنا وحشيين خالص

المأسوف علي شبابة

سكتم بكتم

المصري حيفضل مصري

أتاحت لي الظروف العمل كطبيب في أحد المنتجعات السياحية لفترة مؤقتة والشغل مع الأجانب ياجماعة حاجة تانية خالص
لا محدش يفهمني غلط
بس أنا ححكي لكم شوية حواديت وأنتم تحكموا بنفسكم
راجل فرنساوي بس من أصل تونسي خواجة يعني تعب بشكل مفاجئ وأضطرتنا الظروف نحجزه في العناية المركزة ومن هنا بدأت الأتصالات تنزل ترف علي دماغي القنصل الفرنسي والملحق الطبي والتأمين الفرنساوي ومتهيألي أن كل واحد معدي في شارع الشانزلزيه أتصل بيا في اليوم الغريب ده .الكل بيسأل عن حالته بالتفصيل الممل ..
طبعا علي عادة التفكير المصري قلت لنفسي أكيد يا واد الراجل دة حاجة كبيرة قوي في فرنسا ويمكن يطلع قريب ساركوزي من نحية الأم..فسألت كدة من تحت لتحت لقيت أية يانهار نهار الراجل طلع موظف حكومة .. موظف حكومة عادي خالص مالص..
واللي يغيظ ويفرس أكتر أسمعوا دي .. التأمين بتاعة يبعتله طيارة خاصة تنقله فرنسا وياريت عادية إنما طيارة عناية مركزة ومعاها دكتور مشاء الله حاجة تفرح ممكن لو جه عندنا يمسك وزير صحة بعد يومين
وأنا بقي قعدت أعصر في دماغي علشان أفتكر الفرنساوي بتاع الثانوية العامة علشان أكلم الراجل الخواجة ده .. ومفتكرتش غير جملتيين كومن تا بل تي و التانية سل فو بلي بس الصراحة مش فاكر معناهم أية
الغريب في الموضوع أن الناس دول ياجماعة كانوا بيسألوا بحب حقيقي وتعاطف واضح مع المريض كفاية لوحده أنه يخلي أي مريض يخف
والحقيقة عرفت قد أية المواطن الأجنبي غالي عند بلده وعرفت لية هو بيحب بلدة
والسؤال لو الوضع معكوس يعني لو المريض ده مصري في فرنسا وليه تأمين في مصر وهو موظف حكومة عادي ياتري مين حيسأل عليه غير أمه اللي من كفر البطيخ !!!!
يلا بقي سلام

سكتم بكتم

صباح الحر

عندما خرجت إلي الشارع اليوم أحسست بشعور الفرخة المسكينة في إناء من الشوربة الساخنة
فكلنا فراخ مسلوقة في حلة الوطن
صباح الحر

طريق الورود

يحكي أنه في أحد الأزمنة البعيدة كانت هناك أمرأة عجوز تسكن علي مقربة من النهر . في صبيحة كل يوم تأخذ المرأة وعائين لها من الفخار لتملأهما من النهر المجاور.

كان أحد الأوعية سليما والأخر به شرخ يسرب الماء طوال الطريق ولكن المرأة كانت تحب الوعائين ولم ترضي أن تبدل الوعاء المشروخ بأخر سليم رغم أنه لم يكن ليوصل أكثر من نصف ما ملئ به من ماء

و تمر الأيام والوعاء السليم يحس بالفخرو الأعتزاز فهو لا يسرب الماء ويصل إلي البيت تفيض جوانبه بالماء فيشرب منه أهل البيت حتي يرتووا.ويغسلوا ثيابهم ويجهزوا طعامهم

ويوما بعد يوم يزداد الوعاء المشروخ حزنا وهما وخجلا .فهو غير كامل .بل أنه عاجز علي أن يؤدي مهمته الوحيدة التي وكل بها

حتي جاء أحد الأيام فسأل سيدته في حزن

الوعاء:سيدتي أنني أشعر بالخجل .فأنا غير كامل .أنني عاجز. لقد قررت أن أطرح نفسي لي الأرض فأكون ألف قطعة وأريح نفسي وأريحكم

المرأة العجوز: ياوعائي العزيز تعالي لأوريك.أنظر جيدا إلي الطريق من الناحية اللتي أحملك منهانظر الوعاء فإذا بهذة الناحية من الطريق وقد أمتلأت ورودا ورياحين وفاحت منها رائحة الربيع

قالت المرأة : لقد علمت أنك تسرب الماء .فعمدت إلي البذور أزرعها علي طول الطريق وكن أنت من يسقيها كل يوم حاملا لها الحياة عبر جدارك المشروخ

يا وعائي العزيزنحن كلنا عيوب وشروخ وهي ما يصنع حياتنا لا عيب أن تحاول الإصلاح ولكن إذا لم تفلح فعليك أن تتقبل الأشياء كما هي وأن تري الخير في كل شئ وتحاول الأنتفاع بة علي علتة تكن سعيدا وتسعد من حولك

قصة لم أهتدي لمصدرها الحقيقي وقرأتها بأكثر من رواية

ترجمها لكم من الأنجليزية بتصريف

سكتم بكتم

الرجل القوي

مسترخي هو علي كرسيه المريح علي جانب المغطس الضخم في قصره المنيف .يتابع أبنته ذات الأربعة أعوام اللتي تلعب من حوله . ملاك صغير هي بعيونها العسلية وشفاها الوردية وشعرها الذهبي . ملاك صغير هي هكذا قال لنفسه
شعور عام بالقوة والعظمه داخله وهو ينظر لكل ما حوله . أنه هو من صنع نفسه .لا فضل لأحد علية .أنه قوي شديد مرهوب الجانب في العمل والبيت علي السواء .معروف عنه الحزم وربما أنعدام العاطفة . لايهم هكذا قال لنفسه فأنا قوي ناجح وبالتأكيد أنا علي صواب طالما تحقق لي هذا النجاح
يدق جرس الهاتف المحمول .يرفعه علي أذنه في كبرياء وبعد دقائق يبرم صفقه بمبلغ طائل .أن الأموال تلد هكذا قال لنفسه فأنا قوي قوي جدا
ينظر حوله ... هناك شئ مفقود ..لكن ما هو .. أنها ملاكه الصغيرة .. أين هي لقد كانت أمامه منذ دقائق ؟!
وفجأة تصله الفكرة يقفز مزعورا مصعوقا لينظر إلي المغطس أنها هي في القاع شعرها الذهبي متناثر من حولها . أنها تغرق .
لا يمكن أن يحدث هذا له ..
لايمكن.. أنه يحلم سيفيق حالا ..
لا لا .. أنه الواقع ..
الدنيا تغيم من حوله لكنه يقاوم ..يقفز بكامل ملابسه ليخرجها من الماء
لا تنفس .. الشفاه الوردية صارت زرقاء والعيون العسلية تعلوها غمامه
لا يمكن أن يحدث هذا له ... سيفيق حالا
لا لا.. أنه الواقع
فكر في أن يصرخ فقط ليكتشف أن لسانه قد شل .فكر في أن يقوم ليطلب المساعدة ولكن مهلا لقد شلت ساقه
لم يشعر إلا والدموع تنساب حارقة علي وجنتيه
أنا ضعيف أنا ضعيف يارب محتاج لك ساعدني هكذا قال لنفسه
وهنا يدخل عليه صديقه الطبيب بالصدفه -أو هي إرادة الله- ليجد أمامه الأبنه علي الأرض وقد فارقها التنفس والأب فوقها جاثيا مشلولا .. يبدأ إسعافاته الأوليه للبنت اللتي تسترد أنفاسها ومعها يسترد الأب حواسه وتتعافي بأمرالله بعد يوم واحد في العناية المركزة
يوم تمزق فيه قلب الأب ألف مرة وأحس بالندم كل دقيقه
وتعلق قلبه بشفاه الطبيب يستنطقه أخبارها
يوم لم يجلس فيه علي كرسي ولم يرد فيه علي صفقاته
يوم مر عليه كألف ألف يوم
ولم يشغل تفكيره إلا شئ واحد وهو دعائه يارب خذ عمري ومالي وصحتي وأجعل أبنتي تفيق
للعلم أغلب مافي هذه القصة حقيقي تماما..ولن أنسي أبدا مشهد هذا الأب مرهوب الجانب وهو يبكي علي يد أبنته بعد لأن أستردت وعيها وهو يقول أنا ضعيف ياحبيبتي أنا ضعيف سامحيني

يتجبلي شكلاته يابلاش ياولا

السلام عليكم يا بهوات .. وقت فتح المظاريف وفرز الأصوات

بس الأول ليا ملحوسه صغيرة

أنتوا ليه ياجماعة شايفين الدنيا ضلمة كدا مفيش شوية نور.. ياعني الحاكم هو هو.. وعلامات الساعة أتحققت والدنيا أنتهت.. وأخ عزيز حيصلي ركعتين ويدعي أن ربنا يرحمه زي أهل الكهف .. أما أكتر الإجابات الحزينه فكانت لأخت عزيزه قالت: تلاقي الناس وقفه للحساب ومنتظره دورها لان بصراحه الدنيا كدة خلاص بدأت فى النهايه.وأخت تانيه رافضة أنها تفكر أصلا في المستقبل بما أن الواقع صعب ومش عارفين نعيشه . وشاب متأكد أن في المستقبل مفيش مدينه أسمها القدس أختفت والناس مش فاكراها

يانهار يانهار لما يبقي الشباب متشائم للدرجة دي أمال لو سألت ناس فوق الخمسين ولا الستين
للعلم أحنا كلنا وبما فيكم أنا أصبحنا بنشتكي كتير من المجتمع والظروف والسياسة والعيشه واللي عايشنها ونسينا أن فيه لسه الخير موجود فيه أنتم وفيه أصوتكم وفيه رغبتكم في تغيير الغلط وتحسيين الصورة
لا ياجماعة شوية تفائل . ومش عايز زعل من الصراحة

أما عن باكو الشيكولاته فأنا حختار أكتر الإجابات تفائلا وخيالا حتي لو مش واقعية إجابة الأخت أماني بنت الجنوب سامع همهمه وإعتراض طب أسمعوا الأسئله الأول

س 1ايه الجديد عندكو؟؟
ج1 انهيار امريكا وصعود مصر لقيادة العالم وذلك بعد هزيمتها فى العراق وايران واقامة دولة فلسطين
س2 مين حكام مصر؟؟
ج 2 مش عارفيين فى ناس بيقولوا انه حفيد عمر بن الخطاب رضى الله عنه وفى ناس بتقول حفيد عمر بن عبد العزيز وفى ناس بتقول حفيد صلاح الدين وفى ناس بتقول حفيد قطز
يلا هات الشيكولاته ياريت ميكونش كادبورى علشان المقاطعة


تفائل تفائل..واللي عجبني أنها حتي وقت الجايزة مش عايزاها أمريكاني
تحياتي للأخت بنت الجنوب وألف مبروك

بس الأخت الفاضله من أسوان علي حد علمي وأنا من أسكندرية
وعليه فلو تحب تتفضل تستلم جايزتها أهلا وسهلا ولو بعيد عليها
أنا ححفظها لها في الأمانات بتاعتي ( بطني ) نياه نياه نياه

أحب كمان أقدم جايزة خاصه للأخ الفاضل بينو علي أسألته الصعبه اللي تحتمل معاني كتيرة ..ويارب يكون ساكن بعيد هو كمان.

وبحب أشكر كل اللي تعب وجاوب أو حتي علق بس وفيه للعلم إجابات ظريفه كتيير زي الأخت أمولا اللي كان نفسها تسأل أول واحد حتقابله بعد مية سنه هي الشيكولاته راحت لمين ؟ أظن عرفت دلوقتي هههههههه
والست أيوية اللي حتسأل عن طوابير العيش .. وحاسه أنهم قريب حيلغوا العيش .. والناس مش حتعرف ده أكل ولا شرب. والأخت ماعلينااا المهتمه بموضوع البنزين ربنا يستر لتولع في المدونه بتاعتي علشان مخدتش الشيكولاته
والشنكوتي الغلبان اللي كل همه بعد مية سنه أنه يلاقي شغل ربنا معاه
وطبعا مقدرش انسي الأخت الأهلاويه خمسة فضفضة اللي متأكدة من فوز الأهلي بالدوري حتي بعد مية سنه
وأسف لعمرو باشا توارد الخواطر بقي نعمل أيه
أسف ياجماعة لو نسيت حد لكن أنا عارف أن دماغكم أكبر من كده

أما السؤال اللي كنت حسألة أنا هو

مسمعتش يا أخ عن واحد أسمه سكتم بكتم ؟؟مسبش أي أثر في الدنيا بعد ما مات؟؟
والإجابة : مين ده بيبيع فجل !!

شكرا ياجماعه وتذكروا كن جميلا تري الوجود جميل والمستقبل كمان بعون الله

مية سنه مستقبل

تخيل معايا أنك دخلت تنام وصحيت الصبح لقي النتيجة مقدمة 100 سنة حاجة بسيطة .. نزلت الشارع زي المجنون سألت أول واحد قابلك قالك أحنا في سنه ألفين ميه وسبعة

لو تحب تسأله سؤال عن المستقبل ياتري يكون أية ؟؟

وتتخيل أية حتكون أجابته

اللي يحب يجاوب علي السؤال في التعليقات أهلا وسهلا

اللي يحب يجاوب في مدونته برضة أهلا وسهلا بس يقولي أنه جاوب

اللي يحب ميجاوبش خالص برضة أهلا وسهلا بس بعد أسبوع من دلوقتي حنختار أجمل أجابة

وهدية قيمة للفائز باكو شيكولاته وأنا عارف معظمكم أطفال وبتحبوا الشيكولاتة

يلا قولولي رأيكم

تاج تاج تاج

حبيب قلبي و مصدر معاناتي وأخر صبري أخي ماعلينا بعتلي تاج..منك لله ..أنا مش قايلك ومفهمك أني حبطل كتابة و لكن تقول أية الغلاسة كنز لا يفني ولا يستحدث من عدم..أنا مش فاهم أنت مستحمل نفسك أزاي ..يلا ماعليناالمهم أني سمعت أن القوانين هنا صارمة جدا في موضوع التاجات ده وبالتالي فأنا مضطر بس تفتكر حسيبك لأ حدعي عليك أن ربنا يرزقك بواحدة تطلع عليك القديم والجديد قول يارب

أحب شخص لقلبك في الدنيا؟

أمي طبعا وبلا منازع الست الطيبة الذكية اللي فهماني تعرف أمتي تسألني مالك علشان أتكلم ..وتعرف أمتي متسألش لو عارفه أني مش عايز أقول ..تعرف أنا عايز أية من غير كلام ..فهماني بجد..وعلشان كدة أحب أدلعها دايما ..والبكش مفيش أكتر منه..بس بصراحة أنا أهم الأشياء في حياتي عملتها لمجرد أني أحس أنها نفسها فيها ...بحبك يا أمي

انسان مستعد تضحي بحياتك – ركز فى كلمة حياتك – عشانه؟

أمي تاني وتالت ورابع وبعد كدة أي واحد بيحبني حتي لو مبحبوش لو فهمتوا قصدي

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

الأحساس دة بيبقي في لحظات مع بعض الناس أفتكر أن ده حصلي مع معيد عندنا في القسم واحد حاسس بنفسه قوي وشايف الناس في ما عداه كذابين وكسالي ويمكن صراصير كمان مرة أتخانقت معاه لما قالي أنت كذاب وكان نفسي في مدفع كلاشنكوف أفرغه في صدره وأقعد أشوفه بيبوس رجلي علشان أسامحة وأنا أبدا وأنا أبدا راسي وألف جذمة قديمة لأفرغ ال 7 تلاف طلقة في صدره .. بس للأسف مكنتش أعرف الكلاشنكوف بيشتروه منين

ما هو اسم اجمل كتاب كتبه بشر قراته ومحتفظ به حتي الان؟

قصة غريبة أسمها صورة دوريان جراي لو حد قراها لكنها قصة نفسيه عميقة وغريبة قرأتها مترجمة كنت شايف فيها جزء مني وده خلاها قصة مرعبة جدا بالنسبة لي اللي سمع عنها يمكن يفهم واللي مسمعش يمكن في يوم أحكي عنها

اسم كتاب كتبه بشر برضة- انت متعلق بيه وبتقرأه كل فترة؟

كتاب أوكسفورد في طب الطوارئ مضطر أقرأه كل فتره وشايله زي ما أي واحد فيكوا شايل محفظته

اهم جهاز منزلى انت متعلق بيه او بتستخدمه كتير؟

الولاعه الكهربا بحبها فعلا وبموت فيها وساعات لما بكون فاضي بخصص لها وقت أقعد أتكتك بيه

مكان تحس بالراحة عندما تدخله؟

البييييييييييييييييييت ده طبعا أزي دخلته

شىء تحس بالراحة النفسية عندما تنظر اليه؟

البحر من السلسلة للقلعه

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

صور مستشفي الشاطبي الجامعي من علي البحر وطبعا عارف لية بس مش حقول

اجمل مدينة زرتها داخل مصر ؟

أسكندرية بلا منازع

أجمل مكان طبيعي رأيته داخل مصر ؟

عجيبة في مرسي مطروح

شخصية كارتونية بتحبها

بطوط وميكي وبندق وسوسو ولولو وتوتو ودنجل وزيزي وعم دهب وعصابة القناع وعبقرينو وبجز باني ودافي داك وكل الأخوة في لوني تونز ربنا يديم المحبة

نوع هاتفك المحمول؟

نوكيا 6680
سرعة بروسيسور جهازك؟

الديسكتوب 2.4 واللابتوب1.7
حجم ذاكرة –هارد- جهازك؟

الديسكتوب160 جيجا واللابتوب 80 جيج

ا
المساحة التى تشغلها المواد الاسلامية على جهازك؟

حوالي 3 جيجا

أهم هدف انت واضعه لحياتك الآن؟

أتجوز وأتلم بقي

مواصفات فتاة الأحلام بالنسبة لك؟

عايزه بنت مش زي أي بنت .. عايز واحدة تفهم أنها واحدة..عايز بنت متقلش أنا زيي زيك ..عايز واحدة تفهم أن قوتها في ضعفها وجمالها في عقلها وسلاحها هو حنانها ورقتها..عايز أتجوز زهرة رقيقة قطة بريئة ..مش بمعني الجمال الجسدي ولكن خفة الروح وسرعة البديهة وفهم الأخر وأحتوائه ..من الأخر عايز واحدة مش موجودة وعلشان كدة أنا لسة متجوزتش

صف ما يأتى:

شعورك لما بتسمع كلمة مصر ؟

ملل من التكرار

شعورك لما بتسمع كلام عن اليهود؟

ملل من التكرار

شعورك لما بتشوف ظابط شرطة؟

بفتكر علطول الوسايط اللي خلتهم كدة والوسايط اللي حصلوا عليها لما بقوا كدة وتكتمل الدايره

شعورك لما بتشوف الكناس العجوز فى الطريق؟

بفكر لو الراجل دة تعب في يوم مين حيعالجة لو أحتاج عملية مين حيعملها له ..ياتري ليه أولاد ياتري بياكلوا أيه وعايشين أزاي ..بفكر أني لو كنت أتولدت في نفس ظروفه كنت بقيت هو ولو أتولد في نفس ظروفي كان بقي أنا..وبالتالي أنا مش أحسن منه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

بحسده أنه عنده مبدأ ومبيهموش رأي الناس فية أما أنا فللأسف يهمني رأي الناس حتي لو عارف أني بعمل الصح ... طبعا في حدود ملا يغضب الله

احساس يراودك فى اشارة مرور مغلقة بسبب مسئول كبير؟

بلاش أقول لحسن الرقابة تشيل التعليق

أستريحت يا عم الشيخ أديني جاوبت ..إن شاء الله تكون مبسوطومعرفش يمكن أكتب قريب ويمكن بعد كتير ويمكن مكتبش خالص معرفش

يلا سلام بقي

أمنعوا الضحك

ياجماعة اللي لية غرض يقرا الموضوع ده لا زم يقرا القصة الي قبلة الأول ..ولو قراها يبقي يستعد للنكد اللي جاي علشان أنا مليش مزاج تضحكوا النهاردة

إلا كل من عبرني ورد عليا في الموضوع اللي فات متشكر قوي ياجماعة بس أنا لا حظت شوية حاجات حقولكم عليها

الأولاني ..أن الموضوع عبارة عن شقيين الأول محدش جاب سرته خالص في التعليق وهو الكلام الي بنقوله وملوش أي معني وأن أحنا شعب عاطفي ومش عملي بالمرة..شفتم الراجل قعد يقوله أحنا بنشتري رجالة ويضغط علي أعصابة لغاية متشل وكان ممكن يقولة بكل بساطة يابني أحنا عايزين نعيش بنتنا في مستوي أنت متقدرش علية أو حتي روح يبني كون مستقبلك الأول وبعدين أبقي تعالي وكان سعاتها ريح وأستريح أنما نعمل أية شعب طيب قوي.
.بس من وجهة نظر أخري دي مش طيبة ولا حاجة ده ضحك علي الدقون ومسكنات لضمير الأب الي بيحب بنته وخايف عليها من البهدلة مش عايز يحس أنه رفض الولد علشان الفلوس وعمال يقول لنفسة قبل مايقول للولد أحنا بنشتري رجالة أحنا ميهمناش الفلوس ومش عايز يعترف أن الفلوس مهمه ومهمه جدا كمان بالنسبه له ويمكن بالنسبه للناس كلها.

التاني..أنكم ظلمتم الشاب المسكين وطلبتوا منه يصوم الدهر كله ..أنا عارف أن ده حديث الرسول علية الصلاة والسلام الذي لاينطق عن الهوي..بس برضه ده رسول الرحمة الذي كان يزوج الناس بصاع من تمر وأنا شايف أن الي بيحصل دة ميرضيهوش أبدا...إزاي نطالب الشاب بصيام الدهر وحنا حطين قدام عنيه المحرمات ليل نهار و مسهلين الحرام جدا ومصعبين الحلال جدا جدا..وبنقوله علشان تتجوز قدامك كذا حل

تكون وارث عن بابي ومامي لأن بمجهودك الحلال لا تتوقع الكثير مهما تعبت

تسرق أو ترتشي أو تتاجر في الحرام علشان تجيب فلوس تعف نفسك في بلدك

تسافر الخليج تشتغل في السخرة سنين طويلة تضيع زهرة شبابك في الذل والغربة وترجع تتجوز أي واحدة والسلام وسيبك م الحب والمسخرة والكلام الفارغ

تصوم الدهر كله و تترهبن ومتتوقعش تفك صيامك أبدا وأنتظر الحور العين في الأخرة (اللهم أمين

أنت لية مصدع نفسك يابني (دة الشيطان اللي بيتكلم) ماالزنا واللعب بالديل والفيديو كليب قدامك طول النهار واليل ولا أنت غاوي وجع قلب

أنا شايف الأب مظلوم لأنه بيحب بنته وخايف عليها من البهدلة
وشايف الشاب مظلوم لأنة مش لاقي وسائل الحياة الكريمة الي يعف بيها نفسة
لكن شايف المجتمع مخطأ وخطأ لايغتفر...إلا تفعلوه تكن فتنة في الأرض وفساد كبير

الشاب المفروس المتغاظ منكم
سكتم بكتم

أحنا بنشتري رجالة

أحنا المصريين ناس طيبين قوي. متعودين علي الكلام الطيب. حتي لو ملوش أي معني....شوفوا المثال الأتي

راجل طويل عريض ملو هدومه .بس جيوبه أنضف من الصيني بعد غسيله .يتوجه إلي بيت العروسة . في أيده اليمين الست الوالده وفي أيده الشمال صنية بسبوسة. وفي قلبه حب وليد وفي عقلة أحلام البيت والأسرة والأولاد
ليجد أمامة الأب الكلاسيكي قاعد في الصالة الكلاسيكية وبيقول الجملة الكلاسيكية

الأب(باسما) :أحنا يبني بنشتري رجالة

العريس(وقد هدأت نفسه وأحس بالثقه ) :ربنا يخليك ياعمي

الأب:أنما قولي أنت من عيلة مين ؟

العريس(وقد أزدادت أبتسامته أتساعا وأرتفعت جبهتة في شموخ):أنا ياعمي من عيلة الفلاح .أبويا كان فلاح وجدي فلاح بس الحمد لله ربوني أنا وأخواتي التسعة أحسن تربية

الأب (في شرود) : طبعا ياأبني طبعا.... أحنا بنشتري رجالة... أنما قولي أنت عندك شقة؟؟

العريس (في بساطة) :والله ياعمي أنا لسة بدور علي شقة وبصراحة أكتر لسة بدور علي فلوس الشقه....نياه نياه نياه

الأب (وقد أحمر وجهة وبدأ يجز علي أسنانه) : يابني أحنا بنشتري رجالة ...أنما قولي أنت بتشتغل أية؟

العريس ( بأبتهاج شديد وقد أثرت فية كلمات الرجل المشجعة) : والله ياعمي أنت عارف أنا خريج هندسة والحمد لله أستلمت شغلي من يومين بس في الهيئة العامة للرقابة علي اللبان .صحيح المرتب صغير شوية بس أنا واخد وعد أني أتثبت بعد خمس ست سنين

الأب (وقد بدأت تظهر علية أعراض الشلل والشيخوخة المبكرة ) :يابني أحنا بنشتري رجالة ..أنما قولي هو المرتب كام ؟؟

العريس (وقد أتسعت أبتسامته لتملأ الصالة) : مية سبعة وأربعين جنية وتلاتة وسبعين قرش بالتمام والكمال

الأب :بره

العريس: نعم ياعمي

..........الأب (وقد شل فعلا) :بره بيتي يا أبن ال

وهكذا أيها الأخوة نجد أننا شعب طيب قوي قوي ومنقصدش أي حاجة من اللي بنقولها
أية رأيكم مين الغلطان الأب المشلول ولا العريس النضيف الي عايز يعف نفسة ولا الدنيا هي الي وحشة وكخه؟؟؟؟
أحب أعرف رأيكم..... سلام

كدة هو تعملها فيا تفقعني الزمبة دية

أخي اللدود ماعلينا..حبيب قلبي كدة هو تعملها فيا تفقعني الزمبة دية...وتبعتلي تاج...طيب ...ماشي..بس خلي بالك لعبة فضح الأسرار لعبة ممكن يلعبوها أتنين...خد بالك

حجاوب ..بس وحياة زحلف الي عمرة في يوم مايحلف لوريك

section 1

last beverage? حاجة سقعانةِ

last phone call ? إلي الرقيقة البريئة الملاك

last instant message ? لماعلينا باشا

last cd played ? تيمون وبومبا

last time u cried ? في أودة العمليات يوم ما أتولدت

last text message ?

إلي الرقيقة البريئة الملاك

Section 2 - Have You Evers

dated someone twice? ,ولا مرة ولا مرتين وحياتك

hv u evers been cheated on ? لا لا

kissed someone & regretted it? يارييت

lost some one special? كتير بس بعد ما بخسرهم بكتشف أنهم مكنوش شبيشيال ولا حاجة

been depressd ?هو أحنا بنعمل حاجة في أوقات الفراغ غير الأكتئاب

been drunk and threw up?

إيه يا عم الأسئلة دي أشحال لو مكنتش راجل محترم

Section 3 - List 3 Favorite Colors

Blue, blue &blue

Section 4 - This month have you

• Made a new friend? No
• Fallen out of love? Yes yes yes yes yes yes yes yes yes yes yes yes yes yes yes yes yes yes
• Laughed until you cried? ده يبقي هبل ولامؤخذة
• Met someone who changed your life? Yes yes yes yes yes yes yes yes yes yes yes yes yes
• Found out who your true friends were? مش من الشهر دة بس
• Is there something you want to tell someone? أيوة مش قايل علية
• Would you kiss anyone on your top friends? لا
• How many people on your top friends do you know in real life?كلهم
• Do you have any pets ? كان نفسي أربي أسد ولا نمر أسيوي بس بابي رفض
• Do you wanna change your name? لا أنا معجب بأسمي ولا أنتم أية رأيكم مش موسيقي
• What did you do for your last birthday? سألت نفسي ياتري فاضل أد أية علي المحطة الي حنزل فيها
• What time did you wake up today? منمتش أصلا
• What were you doing at midnight last night? في الشغل
• Name something you CANNOT wait for? رؤيه عنيها الباسمة وضحكتها البريئة أحمرار وجهها من الخجل
• How many kids do you want to have? ولدين وبنت وتكون الصغيرة
• Last time you saw your father? حوالي أسبوع أو عشرة أيام
• What is one thing you wish you could change about your life? والله أنا كويس كدة بس محتاج شوية فلوس ..حد يقدر يساعدني
• What are you listening to right now? صوت بتاع الفول
• Have you ever talked to Tom? مين توم ده
• ؟؟Have you ever talked about someone behind their back? للحق أيوة
• What’s the last piece of clothing you borrowed from anyone? شرابات الحاج أبويا قصدي بابي
• Most visited webpage? http://soktomboktom.blogspot.com/
• Coke or Pepsi ? ميراندا
• Mac or PC? pc

متهيألي كدة عداني العيب بس ياماعلينا أنت عايزها حرب فهي الحرب أذا

سلام عليكم

الحلقة الرابعة والأخيرة ..مملكة العمي

التصوير داخلي.. الملك داخل من باب السجن علي أيديك اليمين بالملابس البيضة والحاشية داخلة وراة بالملابس السودا وفجأة ينهال علي رؤسهم التراب والعفارويشموا رائحة العفن والنتن

الملك : يادلدول يا زفت أنا مش قايلك ميت مرة قبل كده تغسل شرباتك كويس قبل مانخرج

دلدول : والله ما أنا ياباشا. ده هي ريحة سجونك ياملك

الملك : أية يامهموز أنتم مبتحموش المساجين ولا أية؟؟

مهموز : يبوشوا مننا ياملك أحنا خايفين عليهم.

الملك (بأستغراب): أية الحكاية يا واد يا دلدول ده حتي السجانين طفشوا.

دلدول: الظاهركدة يامولاي دي أبواب السجن مفتوحة علي البحري.

الملك : أنا أفهم أن المسجون هو اللي يهرب طيب السجان يهرب لية.غريبة

الملك ماشي في ساحة واسعة مليئة بالأقفاص الحديدية والأبواب مفتوحة علي مصرعيها.وداخل كل قفص يجي 9 أو 10 مساجين.وكل منهم أشعث أغبر جلبيته مقطعه ونازل هرش في جسمة.

الملك: سبحان الله السجن مفتوح ومحدش هرب لية..

دلدول : الظاهر العيال دي يامولاي بتحب البلد بجد و مرضوش يعملوا زي الخونة التانين

الملك(مناديا علي أحد السجناء باين علية الغباء):أنت يابني أدم السجن مفتوح مهربتش لية ؟!

السجين الغبي:هس هس دي خدعة عاملها الحراس.علشان الي يهرب يعذبوه زيادة. أدخل يا راجل أنت بسرعة أنت واللي معاك جوه أي قفص. لحسن يكهربوكوا. ويسلقوكوا. ويحمروكوا

الملك:أنت باين عليك غبي يا واد أنت وبعدين سلق أية وتحمير أية.أنت مش عارف أنا مين ..و قولي هنا تهمتك أية وبقالك هنا قد أية؟؟

السجين الغبي(ناظرا نظره بلهاء في سقف السجن): والله ياعم ماأنا فاكر.. أنا هنا من وأنا صغير , مش فاكر غير كلمة واحدة طلعت قلتها في مظاهرة واحدة وياريتني ماقلتها..... الأهلي حديد..

!! الملك : طب وخدوك لية

مهموز (هامسا في أذن الملك) مش فاكر يامولاي ماتش الأهلي والزمالك الي كان من كام سنة كدة والأهلي هف الزمالك ستة واحد..مش أنت ساعتها كنت زعلان ومهموم وقلتلنا أنا نفسي الأهلي ده يختفي من الوجود.

الملك (في غل) : تقوموا تحبسوا المشجعين ياظلمه ..أنا مش قايلكوا تحبسوا الفريق بس.

مهموز: يافندم الفريق والمدرب ووالجهاز الفني كلة . وجماهير الأهلي كمان...وأحنا يخلصنا زعلك ياباشا..دة حتي حارس بوابة الستاد جبناه وعذبناه سنتين لغاية معرفنا أنه زملكاوي قمنا خرجناه علطول.

الملك : لا فالح وأمال فين شحرور الزفت.

دلدول : هناك أهه ياسيد الناس.

وأتجة الجميع بأنظارهم إلي حيث أشار دلدول ليجدوا الحكيم شحرور و وقد أزدادت نحافتة وبرزت عظامه .إلا أن أبتسامة مضيئة أشرقت في وجهه.

شحرور:أنا هنا يابعجر

الملك :شحرور حبيب قلبي وروحي.شفت الي حصلي.الشعب هرب مني .شعبي الي بيحبني وبيموت فيا هرب مني.و حياة عنيك قولي الشعب راح فين؟؟.وأزاي أرجعه؟؟

شحرور (وقد أتسعت أبتسامته أكثروأكثر): عايز تعرف الشعب راح فين ..مش حتصدق يابعجر...الشعب موجود حواليك محدش هرب محدش مشي.

الملك(بدهشه):أزاي الكلام دة ياشحرور..وهو أنا أتعميت.

شحرور: أيوة أنت أتعميت من زمان .وكل يوم بيزيد عماك عن اليوم اللي قبلة . لحد مجة اليوم اللي صحيت فية مشفتش الشعب رغم أنة حواليك في كل مكان. البواب والسفرجي والسواق كلهم الشعب . فضلت تتجاهلهم وتتجاهل مطالبهم وإحتاجتهم البسيطة.وتنساهم يوم بعد يوم لحد لما عنيك نسيت ملامحهم ووجهم .وواحدة واحدة أصبحت مش شايفهم ومش شايف غير اللي أنت سجنتهم وعذبتهم...أنت أتعميت يا ملك وكل اللي حواليك أتعموا زيك.ومش شايفين غير غرور السلطة ونعيم الدنيا

تعالت الأصوات من حول الملك في خوف و وعدم تصديق..إلا أن كلمة واحدة ظلت تتردد في عقل الملك..الراجل ده كلامة صح.

الملك (بإنكسار):طيب قولي أعمل أية علشان أرجع النور لعنيا.؟

شحرور: سيب العظمة والأبهه . سيب الحاشية الفاسدة اللي بهيللوا ليك مخطأ أو مصيب .سيب الغرور والعنطظه. وأنزل للشعب كل زي مابياكل وأشرب زي مابيشرب وروح أتعالج في الوحدة الصحية المكسرة وصلي في مسجد القرية الصغيروأقف في طابور العيش والأهم حاول تاكل منه بعد كدة وأقعد مع أم سعيد وأم زكية
و دافع عن الحق وأتسجن وأتعذب ...سيب ملكك ياملك ...سيب ملكك يا ملك...سيب ملكك ياملك.. وأتقي الله..يرجعلك نظرك ويرجعلك شعبك

....................

شعب مدونتي العزيز هل تظنون الملك بعجر العظيم قد يأخذ يوما من الأيام بنصيحة الشيخ شحرور الضعيف ؟؟؟
وهل ينصلح حال فسادنيا يوم من الأيام؟؟
ياتري هي دي نهاية القصة ؟؟ ياتري ممكن أكملها في يوم من الأيام؟؟ مش عارف بس الأكيد أني حبتكم فعلا وأستمتعت بردودكم أكتر من أستمتاعي بكتابة القصة الخيالية دي..وأوعدكم أحاول ألاقي وقت أكتب فيه وأصدع دماغكم...بتقولوا عايزين قصة تانية أبقوا تعالوا زوروني مين عارف..يمكن يمكن..وتوته توته دي أخر الحدوته

سكتم بكتم

الحلقة التالتة) الحكيم شحرور )

بلغني أيها الشعب الرشيد ذو العمر المديد والرأي السديد. أنه لما بلغ الحزن بالملك بعجر مداه وأنقطعت أنفاسة من البكاء علي شعبه المفقود وأحتار الوزراء في أمره.وحكموا دلدول حبيبه وكاتم سره.فما كان من دلدول إلا أن عرض عرضا غريبا وأقتراحا مريبا أستنكره الملك ومن وراءه وزراءه الملاعين الأفاقين

دلدول:أسمعوني يا جماعة والله العظيم مفيش غير الحكيم شحرور هو اللي في أيده الحل

الملك :كه إلا شحرور الزفت دة أنت مش فاكر كلامه معايا أخر مره. بقي أنا الملك بعجر يجي حتت بتاع زي دة هدومه مهلهلة وشكلة يقرف البوبي. و يقولي أنا يقولي أنا أتقي الله

دلدول :معلش يامولاي أكيد مكانش يقصد وبعدين هو فيه حد متقي ربنا فينا قدك. يامدلعنا ومهنينا ومريحنا أنت عارف أن الشعب كان بيحبه وكلمتين حلوين منه يرجعلك شعبك بالسلامة ونبقي ساعتها نحبسه هو والشعب كله كمان لو حبيت ويادار مدخلك شر

أجهش الملك من فوره بالبكاء لما تذكر الشعب وأحتار الوزراء في ما يفعلوه فقرروا أنهم ميجبوش سيرت الشعب تاني قدام الملك ويسموه من هنا ورايح الي ميتسماش

الملك:بس حنلقيه فين دلوقت مزمانه كت علي بره

.مهموز:أطمن يامولاي أنا متحفظ عليه في معتقل مخصوص.علشان يعرف يتطاول علي أسياده كويس

الملك:أمري لله يلا بينا علي المعتقل

و صمم الملك علي الذهاب بنفسه إلي المعتقل المعزول علي أطراف الصحراء وطوال الطريق ظل يسترجع ذكرياته مع شحرور

فلاش باك خمس سنين لورا

الملك قاعد علي عرشة وجانبة حاشيته وهيلمانه وسلطانه وقدامه شاشة إل سي دي ستين بوصه وفي أيده سجارة محبشة و علي يمينه وشمالة الوزرا والأغوات والسهرة حتبدأ تحلو وإذ بصوت طرقات عصا علي باب القصر المنيف

الحرس :مين أنت مين يادا العدي

الشيخ شحرور:أنا راجل فقير جاي أدي للملك أمانه سايبها عندي الملك

الحرس :عندك أنت ياصايع ياشحات

شحرور :معلش يوضع سره في أضعف خلقه

وسرعان ماتناقلت الأخبار لتصل إلي مسمع الملك

دلدول:لا مؤخذه يامولاي في واحد شكلة كدة مش ولا بد بيقول عنده أما نه ليك عايز يدهالك

الملك:أمانة أية ياوحل البرك يابهيم. أنت مش شايفني بتفرج علي ميلودي ومستني أغنية الست

دلدول :ست مين يافندم

الملك :الست هيفا يامنيل.الي بتقول فيها أنا هيفا أنا.. أنا هيفا أنا ...أقولك هاتوا وخلاص أنا مشفتش حد من الشعب يجي من عشر سنين كدة أكيد شكلهم أتغير قوي

دلدول:أمرك يا سيد الناس

وبعد ما الشيخ شحرور أتفتش ذاتي وعدي علي ميت بوابه ألكترونية و أتصور بالأشعة الحرارية وجاوب علي خمسميت سؤال وصل عند الملك بعد سنة ونص بالظبط بعد ماخدوا منه الموبيل واللاب توب وسماعات البلوتوث بتاعته.وحتي عصايتة الخشب

الملك :أهلا أهلا أنت مين ياجدع أنت وعامل في نفسك كدة لية.أيه الهدوم المقطعة دي. وأيه النحافة دي أنت عامل دايت ياراجل دا أنت جلد علي عضم

شحرور:الحقيقة أن اللبس بتاعي دة موضه اليومين دول بين الشعب .أو الحقيقة الشعب مش لاقي غير الجلاليب المقطعة والقفاطين المهلهلة. أما الجلد الي علي العضم فده دايت أجباري بنطبقه بقالنا سنين طويلة من يوم ماسيادك شرفتنا بالحكم

الملك(في شك):أنت أسمك أيه يامواطن أنت .وكلامك غريب كدة لية. تقصد أية

شحرور:أنا العبد الفقير لله شحرور

الملك(في دهشة):أه أنا سمعت عنك مش أنت الي مجمع الناس حواليك وعمال تخطب فيهم وتقلب عليهم المواجع

مهموز(هامسا في أذن الملك):خلي بالك يامولاي الراجل ده أحنا مراقبينه من زمان وحطينه هو عيلتة في دماغنا.وبنرقد له علي الهادي

!!! الملك (مغتاظا):وإزاى يدخل لحد هنا يا خيبتها

شحرور:أنا كل الي بعمله أني بفهم الناس وأوعيهم وأخرجهم من غيبوبة الكسل والتبلد والنفاق والكذب والرياء والغش والرشوة والفساد والأنحلال الأخلاقي

الملك(ضاحكا بأعلي صوتة تصاحبة ضحكات من حولة): نياه نياه نياه حد فهم حاجة ياولاد متروح يابني أدم تكلك أكله ولا تتفرجلك علي كليب وتدخنلك سيجارتين متكلفين وتنسي وتكبر دماغك وتعمل زي باقي الشعب. وبعدين قولي أمانة أية الي أنا سايبها عندك أنت ياشحات

شحرور(باسما):أنا ماقلتش أن أنت سايب عندي أمانة أنا قلت أنا راجل فقير جاي أدي للملك أمانه سايبها عندي الملك

الملك(ملتفتا لمن حوله):عبيط ده ولا أية طيب ما أنا الملك يا منخوليا

شحرور(باسما):لا أبدا أنت مجرد خادم عند الملك الي أنا أقصده.الملك الي أقصدة هو الله الكبير المتعال.و ربنا أداني أمانة لازم أأديها ليك ولغيرك

الملك(وقد بدأ وجهه يحمر زي الطمطماية): أمانة أية خلصني و هات من الأخر

شحرور(باسما): العلم يامولاي أنا جاي أقولك أتقي الله. أتقي الله في شعبك . أتقي الله في ملكك. أتقي الله في نفسك

هب الملك واقفا وقد ظهرت عليه أما رات الغضب وهب معه كل من حولة في أنزعاج أنطلقت التفافة من فمه وهو يصرخ بعلو صوته: شيلوا البتاع ده من قدامي

دلدول: هدي نفسك ياباشا. والله مايستاهل. حتي شوف دي أغنية الست هيفا بدأت أهه

ولم يهدأ الملك إلا بعد أن أخذ رجال مهموز الشيخ شحرور في الكلبوش

وبعد أن بدأ الكليب بدأ الملك يهدأ و كان كل تفكيره في شئ واحد ياتري دول سليكون ولا كولاجين؟؟

كل هذه الذكريات تداعت إلي ذهن الملك وهو الطريق إلي المعتقل ليجد نفسة أمام الباب الخالي من الحرس ويستعد للدخول برجلة الشمال ويارب ياساتر

عايزين تعرفوا أية اللي حصل بعد كدة وكيف كانت مقابلة الملك مع شحرور في السجن؟.وكيف كان حال السجناء بعد هروب السجانين؟ وهل يوافق شحرور بسهولة علي معاونة الملك في البحث عن الشعب؟.وما هي شروط شحرور وهل يوافق عليها الملك؟
معلش ياجماعة أنتم عارفين أنا مش حقدر أقول أنا زي ماقلتلكم سكتم بكتم.طيب بس سد سد خلاص خلاص حكمل بس أحب أعرف ردود أفعالكم وهل الموضوع يستحق أكمله.وأحب برضه أعرف أقتراحتكم أزاي نرجع الشعب
وتوتة توتة متجبش سيرت الحدوتة

الحلقة التانية) مليش دعوة أنا عايز الشعب بتاعي)

أحنا وصلنا لغاية فين .حد يفكرني أه أفتكرت كنا في دولة فسادنيا العظمي ووصلنا لحد ما الملك قفل السكة مع دلدول وطلب عقد إجتماع عاجل لبحث المشكلة. بتقولوا مشكلة أية لااا. بقولكم أية الي ناسي يراجع من الأول يالا بسرعة علشان نكمل الحدوتة.راجعتم شطار

المهم دخل الملك غرفة الأجتماعات وأنتظر ساعة أتنين تلاتة ومفيش لحد فيهم أثر.الملك أتوغوش والفار لعب في عبة فقعد يرنلهم واحد واحد.وهم يقفلوا عليه. لحد مدخل علية دلدول ونفسة مقطوع وعمال ينهج

الملك: خير يازفت الطين أية الي أخرك

دلدول: أسكت يامولاي.أسكت متعرف أية إلي حصل. البلد كلها فضيت علينا يامولاي

الملك: يا نهار أسود بتتكلم بجد

دلدول: وشرفي يامولاي ولابلاش وشرفك أنت ياسيد الناس زي مابقولك

الملك:لية وأزاي؟ طب وراحوا فين؟

!!!!
دلدول :علمي علمك يامولاي أنا بعد مكلمتني نزلت جري أدور علي الخدم والحرس ملقتهمش. قلت زي بعضة جريت علي الجراج ملقيتش السواقين قلت زي بعضة أسوق أنا دورت علي التشريفة والحرس الخصوصي ملقتش قلت زي بعضة برضك دة جلالة الملك عايزني . بدور العربية التسعة باب بتاعتي ولقيت الأربع عجلات نايمين . الشعب أبن المؤذية نيملي العجل قبل مايمشي . فخدتها كعابي لغاية هنا.وطول السكة أدور علي جنس بني أدم مش لاقي . ده حتي القطط والكلاب الضالة باينها طفشت هيا كمان.

.
يدخل في هذة الحظة باقي وزراء دولة فسادنيا العظمي وهم مقطوعي الأنفاس وإذ ماحدث لدلدول حدث لهم جميعا

الملك :يا نهار أسود ياولاد أية الي حصل دة. فين الشعب .هاتوالي الشعب .ملييش دعوة أنا عايز الشعب

وإذا بالملك ينخرط في نوبة من البكاء الحاد. ويحاول الوزراء تهدئة الملك

مهموز(وزير الداخلية): والله يامولاي معرف راحوا فين أنا قلتلك من الأول نحبسم كلهم.ونعمل توسعات في السجون أنت الي رفضت وقعدت تقول الحرية الحرية .بس أنا عندي ليك مفاجأة في حوالي تلاتة أربعه مليون أنا حابسهم وقافل عليهم كويس .عامل حساب ظرف زي دة.ممكن أجيبهملك يفكوا زنقه

الملك:تلاتة أربعة مليون يعملوا أية بس .وبعدين دول كلهم المعارضة.لا ياعم مليش دعوة أنا عايز الشعب بتاعي

مهزوز (وزير الأعلام): طيب أية رأيك يامولاي نبعت منادي يدور عليهم. أنا مش عارف هما هربوا لية بس دا أنا حتي في الفترة الأخيرة كنت مدلعهم أخر دلع وجايبله كليبات أية أخر مسخرة والأعلانات ملاينة بنات تهبل .دا حتي الأخباروالجرانين كلها بتتكلم عن عصر الرخاء الي أحنا عايشينة ومتمرمغين فية من ساعة مأنت حكمتنا من تلاتين سنة.والمسلسلات حاجة أية تفرح القلب الحزين ولافيها تفاهه ولا أسفاف ولاحاجة أبدا. أنا مش عارف كان مفروض نعملهم أية أكتر من كدة نشلهم علي حجرنا ونرضعهم

الملك(علي صرخة واحدة)مليييييييييييييش دعوة أنا عايز الشعب بتاعيييييييييييييييييييييي

هلفوت(وزير المالية) :طيب أنا عندي أقتراح حلو أحنا ننزل السوق نشتريلك شعب رخيص كدا وأبن حلال وعلي قد أدينا.ونشوف ملك مهاود كدا يرضي يبعلنا ولو نص شعبوه.والله يامولاي أنا مش عارف الشعب راح فين.دا أنا حتي في الأيام الأخيرة كنت محضرلهم شوية ضرايب أنما أية تستاهل بقك.كنت حخليهم يدفعوا ضرايب علي كل حالة وفاة بصفتها صدقة جارية علي المرحوم والي يعيش أكتر من تلاتين سنة يدفع بردة علشان ممتش من الجوع لحد دلوقتي.وكل ما تعيش أكتر فرصتك في الضرايب تكتر أما لووصلت لستين سنة تبدأ تحاسب بالثانية....أية رأيك.... بس ملهمش في الطيب نصيب حعملهم أية

الملك :منكم لله أنتم الي ضيعتم الشعب مني.مليش دعوووووووووووووووووووة أنا عايز شعبي

كندوز(وزير الزراعة والتموين): أنا يامولاي عندي الحل أحنا نقول أن أحنا نزلنا لحمة في الجمعية الكيلو بأتنين جنية. وحتلاقي الشعب عندك جري.أنا عارفة دة شعب همة علي باطنه.وميحبش حاجة في الدنيا قد اللحمة.دا أنا حتي كنت ناوي في الفترة الأخيرة نوقف زراعة خالص ونسيب الشعب الرزل دة يقرصة الجوع علشان يتعلم يشتكي كويس ويعرف أن الله حق وياكل الخضار أبو سماد ملوث وهو ساكت ويجيلة سرطان ونستريح منه

مصوص(وزير الصحة):أما والله شعب غريب يمكن طلعوا يتعالجوا بره.طب لية داأحنا حتي موفرين لهم كل الأمراض القديمة والجديدة من البهارسيا بتاعت الدودة الأسية.وإلي أنفلوانزا الطيور بتاعت ااكاك كاك.مرورا بجنون البقر والبشر والسلاحف كمان وكلة بالمجان.أنا متأكد يامولاي أنهم حيرجعولنا بسرعة لما يلا قوامحدش عارف يعالجهم من الأمراض المخصوصة بتاعتنا.وساعتها و ديني لوريهم وسيب عليهم الجمرة الخبيثة تظبطهم أنا شايل شوية في بطرمان مربي لوقت عوزه.

صعلوك (وزير التربية والتعليم):أما شعب متمرش فية لا التربية ولاالتعليم.مش كانوا قبل مايمشوا يستأذنوا.هو أحنا عمرنا رفضنالهم طلب.قالوا تعليم مجاني عملناه مجاني وعملنا كمان عادة و كبير ومخصوص وبالكبدة .قالوا جامعات فتحناها علي البحري.يلا خلي الشعب يتعلم صحيح العيال بياخدوا شهاداتهم يعلقوها في الحمام بس ومالة أهه برضة تطرد الناموس وتمنع الريحة.حنعملهم رأيه أكتر من كدة قولي يامولاي

.
كلبوظ(وزير السياحة):متقلقش يامولاي أنا متأكد أنهم راحوا يتفسحوا وراجعين تاني.أنت عارف أن الفلوس كترت في أيد الشعب.وأنا عارفه شعب صرماح.أول ما فلوسة تخلص حيرجع تاني

.
الملك(وقد أرهقه الصراخ والنواح): أشوف فيكم يوم يا شوية بقر . بقي أسيبلكم الشعب ساعتين زمن وأدخل أنام مأصحي ملقاهوش. أتصرفواااااااا.أنا مليش دعوة أنا عايز الشعب بتاعييييييييي

وأحتار الوزراء كيف يرضون الملك وقالوا في نفس واحد أنت ساكت لية يا دلدول متلحقنا يا أخي الملك بعجر حيروح مننا
دلدول:فيش حد يقدر يحل الموضوع دة غير واحد بس

الملك :مين ألحقنا بيه بسرعة

دلدول: الحكيم شحرور

الملك: لاااااااااااااااااااااااااااااااااااااااااااااا كلة إلا شحرور دة

ياتري من هو شحرور؟ ولماذا يكرهه الملك؟ وهل هو قادر فعلا علي حل اللغز؟

مقدرش أقول أنتم عارفيني سكتم بكتم.. علي العموم علشان خاطركم أنتم بس حكمل بس الحلقة الجاية
وتوتة توتة قفل علي الحدوتة

الحلقة الأولي) فين الشعب)

يحكي أنه في سالف العصر والأوان وفي أحد الدول النامية البعيدة وتدعي دولة فسادنيا العظمي كان هناك حاكم عادل يدعي الملك بعجر .كان يحكم بين شعبه بكل العدل والحب والحنان.وأحبه الشعب من كل قلبة .وهتفوا بأسمة وأحبوه وأحبوا أسرته ونادوابأبنه شنخر ملكا من بعدة.حتي كان ذلك اليوم أستقظ الملك من نومه نشيطا فرحا مبتهجا.مستعدا ليحكم الشعب بكل الحب والحنان والدلع .فإذا بة ينظر من نافذة قصره المنيف حتي يطالعه مشهدا غريبا.الشوارع خاوية الميدان أمام القصر خاوي السكون يعم المكان .نادي علي الخدم فلم يرد أحد .نادي علي الحرس فلم يرد أحد

الملك:هم راحوا فين ولاد الذين دول يا حسنين يامحمدين ياعوضين. لم يرد أحد

الملك:أية الحكاية أنامش عارف. لما أكلم الوزير دلدول أعرف منة

ترن ترن ترن ترن ترن تررررررررررررررررررررن

االملك بعجر:مبيردش لية الحيوان دة

الوزير دلدول:ألو أيوة يامولاي

الملك:مبتردش لية ياحلوف

الوزير: والله أفتكرتك بتديني مسد كول

الملك :(بكل غيظ)مش دة المهم دلوقتي المهم أني صحيت من النوم ملقيتش حد في القصرإلا الولية وأبنها.الخدم راحوا فين.فين الخدم.فين الحرس.فين الجناينية .فين الناس الي في الشوارع الي بيحبوني موت ونفسهم أحكمهم طول العمر

الوزير: أيه دة يامولاي هو أنت كمان

الملك: قصدك أية يابني جاموس

دلدول: أصل الحقيقة أن أنا برضة حصل معايا كدة في القصر بتاعي.بصراحة مش لاقي حد خالص.حتي الولية مش لاقيها.قمت من النوم بحسس علي السرير ملقتهاش جنبي .قلت الحمد الله ربنا خادها و لكن لما دورت كويس ملقتش جنس بني أدم في القصر كلة. قمت قلقت وكلمت الوزيرمهموز والوزير قزقوز والوزيركلبوظ ولقيت عندهم نفس المشكلة

الملك :يعني أية الموضوع دة.أسمع يافندي تجمعلي كل الوزرا وتكونوا كلكم عندي بعد نصف ساعة بالظبط ..مفهوم

دلدول: فهوم عظمتك

عايزين تعرفوا أية الي حصل في البلد الصغيرةالجميلة دي.

أنا مليش دعوة أنا قلت مش حكلم سكتم بكتم.علي كل حال مش حزعلكم الحلقة الجاية إنشاء الله قريبة بس بشرط تقولولي تفتكروا راح فين الشعب؟؟؟..وتوتة توتة سك علي الحدوتة