الحلقة الرابعة والأخيرة ..مملكة العمي

التصوير داخلي.. الملك داخل من باب السجن علي أيديك اليمين بالملابس البيضة والحاشية داخلة وراة بالملابس السودا وفجأة ينهال علي رؤسهم التراب والعفارويشموا رائحة العفن والنتن

الملك : يادلدول يا زفت أنا مش قايلك ميت مرة قبل كده تغسل شرباتك كويس قبل مانخرج

دلدول : والله ما أنا ياباشا. ده هي ريحة سجونك ياملك

الملك : أية يامهموز أنتم مبتحموش المساجين ولا أية؟؟

مهموز : يبوشوا مننا ياملك أحنا خايفين عليهم.

الملك (بأستغراب): أية الحكاية يا واد يا دلدول ده حتي السجانين طفشوا.

دلدول: الظاهركدة يامولاي دي أبواب السجن مفتوحة علي البحري.

الملك : أنا أفهم أن المسجون هو اللي يهرب طيب السجان يهرب لية.غريبة

الملك ماشي في ساحة واسعة مليئة بالأقفاص الحديدية والأبواب مفتوحة علي مصرعيها.وداخل كل قفص يجي 9 أو 10 مساجين.وكل منهم أشعث أغبر جلبيته مقطعه ونازل هرش في جسمة.

الملك: سبحان الله السجن مفتوح ومحدش هرب لية..

دلدول : الظاهر العيال دي يامولاي بتحب البلد بجد و مرضوش يعملوا زي الخونة التانين

الملك(مناديا علي أحد السجناء باين علية الغباء):أنت يابني أدم السجن مفتوح مهربتش لية ؟!

السجين الغبي:هس هس دي خدعة عاملها الحراس.علشان الي يهرب يعذبوه زيادة. أدخل يا راجل أنت بسرعة أنت واللي معاك جوه أي قفص. لحسن يكهربوكوا. ويسلقوكوا. ويحمروكوا

الملك:أنت باين عليك غبي يا واد أنت وبعدين سلق أية وتحمير أية.أنت مش عارف أنا مين ..و قولي هنا تهمتك أية وبقالك هنا قد أية؟؟

السجين الغبي(ناظرا نظره بلهاء في سقف السجن): والله ياعم ماأنا فاكر.. أنا هنا من وأنا صغير , مش فاكر غير كلمة واحدة طلعت قلتها في مظاهرة واحدة وياريتني ماقلتها..... الأهلي حديد..

!! الملك : طب وخدوك لية

مهموز (هامسا في أذن الملك) مش فاكر يامولاي ماتش الأهلي والزمالك الي كان من كام سنة كدة والأهلي هف الزمالك ستة واحد..مش أنت ساعتها كنت زعلان ومهموم وقلتلنا أنا نفسي الأهلي ده يختفي من الوجود.

الملك (في غل) : تقوموا تحبسوا المشجعين ياظلمه ..أنا مش قايلكوا تحبسوا الفريق بس.

مهموز: يافندم الفريق والمدرب ووالجهاز الفني كلة . وجماهير الأهلي كمان...وأحنا يخلصنا زعلك ياباشا..دة حتي حارس بوابة الستاد جبناه وعذبناه سنتين لغاية معرفنا أنه زملكاوي قمنا خرجناه علطول.

الملك : لا فالح وأمال فين شحرور الزفت.

دلدول : هناك أهه ياسيد الناس.

وأتجة الجميع بأنظارهم إلي حيث أشار دلدول ليجدوا الحكيم شحرور و وقد أزدادت نحافتة وبرزت عظامه .إلا أن أبتسامة مضيئة أشرقت في وجهه.

شحرور:أنا هنا يابعجر

الملك :شحرور حبيب قلبي وروحي.شفت الي حصلي.الشعب هرب مني .شعبي الي بيحبني وبيموت فيا هرب مني.و حياة عنيك قولي الشعب راح فين؟؟.وأزاي أرجعه؟؟

شحرور (وقد أتسعت أبتسامته أكثروأكثر): عايز تعرف الشعب راح فين ..مش حتصدق يابعجر...الشعب موجود حواليك محدش هرب محدش مشي.

الملك(بدهشه):أزاي الكلام دة ياشحرور..وهو أنا أتعميت.

شحرور: أيوة أنت أتعميت من زمان .وكل يوم بيزيد عماك عن اليوم اللي قبلة . لحد مجة اليوم اللي صحيت فية مشفتش الشعب رغم أنة حواليك في كل مكان. البواب والسفرجي والسواق كلهم الشعب . فضلت تتجاهلهم وتتجاهل مطالبهم وإحتاجتهم البسيطة.وتنساهم يوم بعد يوم لحد لما عنيك نسيت ملامحهم ووجهم .وواحدة واحدة أصبحت مش شايفهم ومش شايف غير اللي أنت سجنتهم وعذبتهم...أنت أتعميت يا ملك وكل اللي حواليك أتعموا زيك.ومش شايفين غير غرور السلطة ونعيم الدنيا

تعالت الأصوات من حول الملك في خوف و وعدم تصديق..إلا أن كلمة واحدة ظلت تتردد في عقل الملك..الراجل ده كلامة صح.

الملك (بإنكسار):طيب قولي أعمل أية علشان أرجع النور لعنيا.؟

شحرور: سيب العظمة والأبهه . سيب الحاشية الفاسدة اللي بهيللوا ليك مخطأ أو مصيب .سيب الغرور والعنطظه. وأنزل للشعب كل زي مابياكل وأشرب زي مابيشرب وروح أتعالج في الوحدة الصحية المكسرة وصلي في مسجد القرية الصغيروأقف في طابور العيش والأهم حاول تاكل منه بعد كدة وأقعد مع أم سعيد وأم زكية
و دافع عن الحق وأتسجن وأتعذب ...سيب ملكك ياملك ...سيب ملكك يا ملك...سيب ملكك ياملك.. وأتقي الله..يرجعلك نظرك ويرجعلك شعبك

....................

شعب مدونتي العزيز هل تظنون الملك بعجر العظيم قد يأخذ يوما من الأيام بنصيحة الشيخ شحرور الضعيف ؟؟؟
وهل ينصلح حال فسادنيا يوم من الأيام؟؟
ياتري هي دي نهاية القصة ؟؟ ياتري ممكن أكملها في يوم من الأيام؟؟ مش عارف بس الأكيد أني حبتكم فعلا وأستمتعت بردودكم أكتر من أستمتاعي بكتابة القصة الخيالية دي..وأوعدكم أحاول ألاقي وقت أكتب فيه وأصدع دماغكم...بتقولوا عايزين قصة تانية أبقوا تعالوا زوروني مين عارف..يمكن يمكن..وتوته توته دي أخر الحدوته

سكتم بكتم

الحلقة التالتة) الحكيم شحرور )

بلغني أيها الشعب الرشيد ذو العمر المديد والرأي السديد. أنه لما بلغ الحزن بالملك بعجر مداه وأنقطعت أنفاسة من البكاء علي شعبه المفقود وأحتار الوزراء في أمره.وحكموا دلدول حبيبه وكاتم سره.فما كان من دلدول إلا أن عرض عرضا غريبا وأقتراحا مريبا أستنكره الملك ومن وراءه وزراءه الملاعين الأفاقين

دلدول:أسمعوني يا جماعة والله العظيم مفيش غير الحكيم شحرور هو اللي في أيده الحل

الملك :كه إلا شحرور الزفت دة أنت مش فاكر كلامه معايا أخر مره. بقي أنا الملك بعجر يجي حتت بتاع زي دة هدومه مهلهلة وشكلة يقرف البوبي. و يقولي أنا يقولي أنا أتقي الله

دلدول :معلش يامولاي أكيد مكانش يقصد وبعدين هو فيه حد متقي ربنا فينا قدك. يامدلعنا ومهنينا ومريحنا أنت عارف أن الشعب كان بيحبه وكلمتين حلوين منه يرجعلك شعبك بالسلامة ونبقي ساعتها نحبسه هو والشعب كله كمان لو حبيت ويادار مدخلك شر

أجهش الملك من فوره بالبكاء لما تذكر الشعب وأحتار الوزراء في ما يفعلوه فقرروا أنهم ميجبوش سيرت الشعب تاني قدام الملك ويسموه من هنا ورايح الي ميتسماش

الملك:بس حنلقيه فين دلوقت مزمانه كت علي بره

.مهموز:أطمن يامولاي أنا متحفظ عليه في معتقل مخصوص.علشان يعرف يتطاول علي أسياده كويس

الملك:أمري لله يلا بينا علي المعتقل

و صمم الملك علي الذهاب بنفسه إلي المعتقل المعزول علي أطراف الصحراء وطوال الطريق ظل يسترجع ذكرياته مع شحرور

فلاش باك خمس سنين لورا

الملك قاعد علي عرشة وجانبة حاشيته وهيلمانه وسلطانه وقدامه شاشة إل سي دي ستين بوصه وفي أيده سجارة محبشة و علي يمينه وشمالة الوزرا والأغوات والسهرة حتبدأ تحلو وإذ بصوت طرقات عصا علي باب القصر المنيف

الحرس :مين أنت مين يادا العدي

الشيخ شحرور:أنا راجل فقير جاي أدي للملك أمانه سايبها عندي الملك

الحرس :عندك أنت ياصايع ياشحات

شحرور :معلش يوضع سره في أضعف خلقه

وسرعان ماتناقلت الأخبار لتصل إلي مسمع الملك

دلدول:لا مؤخذه يامولاي في واحد شكلة كدة مش ولا بد بيقول عنده أما نه ليك عايز يدهالك

الملك:أمانة أية ياوحل البرك يابهيم. أنت مش شايفني بتفرج علي ميلودي ومستني أغنية الست

دلدول :ست مين يافندم

الملك :الست هيفا يامنيل.الي بتقول فيها أنا هيفا أنا.. أنا هيفا أنا ...أقولك هاتوا وخلاص أنا مشفتش حد من الشعب يجي من عشر سنين كدة أكيد شكلهم أتغير قوي

دلدول:أمرك يا سيد الناس

وبعد ما الشيخ شحرور أتفتش ذاتي وعدي علي ميت بوابه ألكترونية و أتصور بالأشعة الحرارية وجاوب علي خمسميت سؤال وصل عند الملك بعد سنة ونص بالظبط بعد ماخدوا منه الموبيل واللاب توب وسماعات البلوتوث بتاعته.وحتي عصايتة الخشب

الملك :أهلا أهلا أنت مين ياجدع أنت وعامل في نفسك كدة لية.أيه الهدوم المقطعة دي. وأيه النحافة دي أنت عامل دايت ياراجل دا أنت جلد علي عضم

شحرور:الحقيقة أن اللبس بتاعي دة موضه اليومين دول بين الشعب .أو الحقيقة الشعب مش لاقي غير الجلاليب المقطعة والقفاطين المهلهلة. أما الجلد الي علي العضم فده دايت أجباري بنطبقه بقالنا سنين طويلة من يوم ماسيادك شرفتنا بالحكم

الملك(في شك):أنت أسمك أيه يامواطن أنت .وكلامك غريب كدة لية. تقصد أية

شحرور:أنا العبد الفقير لله شحرور

الملك(في دهشة):أه أنا سمعت عنك مش أنت الي مجمع الناس حواليك وعمال تخطب فيهم وتقلب عليهم المواجع

مهموز(هامسا في أذن الملك):خلي بالك يامولاي الراجل ده أحنا مراقبينه من زمان وحطينه هو عيلتة في دماغنا.وبنرقد له علي الهادي

!!! الملك (مغتاظا):وإزاى يدخل لحد هنا يا خيبتها

شحرور:أنا كل الي بعمله أني بفهم الناس وأوعيهم وأخرجهم من غيبوبة الكسل والتبلد والنفاق والكذب والرياء والغش والرشوة والفساد والأنحلال الأخلاقي

الملك(ضاحكا بأعلي صوتة تصاحبة ضحكات من حولة): نياه نياه نياه حد فهم حاجة ياولاد متروح يابني أدم تكلك أكله ولا تتفرجلك علي كليب وتدخنلك سيجارتين متكلفين وتنسي وتكبر دماغك وتعمل زي باقي الشعب. وبعدين قولي أمانة أية الي أنا سايبها عندك أنت ياشحات

شحرور(باسما):أنا ماقلتش أن أنت سايب عندي أمانة أنا قلت أنا راجل فقير جاي أدي للملك أمانه سايبها عندي الملك

الملك(ملتفتا لمن حوله):عبيط ده ولا أية طيب ما أنا الملك يا منخوليا

شحرور(باسما):لا أبدا أنت مجرد خادم عند الملك الي أنا أقصده.الملك الي أقصدة هو الله الكبير المتعال.و ربنا أداني أمانة لازم أأديها ليك ولغيرك

الملك(وقد بدأ وجهه يحمر زي الطمطماية): أمانة أية خلصني و هات من الأخر

شحرور(باسما): العلم يامولاي أنا جاي أقولك أتقي الله. أتقي الله في شعبك . أتقي الله في ملكك. أتقي الله في نفسك

هب الملك واقفا وقد ظهرت عليه أما رات الغضب وهب معه كل من حولة في أنزعاج أنطلقت التفافة من فمه وهو يصرخ بعلو صوته: شيلوا البتاع ده من قدامي

دلدول: هدي نفسك ياباشا. والله مايستاهل. حتي شوف دي أغنية الست هيفا بدأت أهه

ولم يهدأ الملك إلا بعد أن أخذ رجال مهموز الشيخ شحرور في الكلبوش

وبعد أن بدأ الكليب بدأ الملك يهدأ و كان كل تفكيره في شئ واحد ياتري دول سليكون ولا كولاجين؟؟

كل هذه الذكريات تداعت إلي ذهن الملك وهو الطريق إلي المعتقل ليجد نفسة أمام الباب الخالي من الحرس ويستعد للدخول برجلة الشمال ويارب ياساتر

عايزين تعرفوا أية اللي حصل بعد كدة وكيف كانت مقابلة الملك مع شحرور في السجن؟.وكيف كان حال السجناء بعد هروب السجانين؟ وهل يوافق شحرور بسهولة علي معاونة الملك في البحث عن الشعب؟.وما هي شروط شحرور وهل يوافق عليها الملك؟
معلش ياجماعة أنتم عارفين أنا مش حقدر أقول أنا زي ماقلتلكم سكتم بكتم.طيب بس سد سد خلاص خلاص حكمل بس أحب أعرف ردود أفعالكم وهل الموضوع يستحق أكمله.وأحب برضه أعرف أقتراحتكم أزاي نرجع الشعب
وتوتة توتة متجبش سيرت الحدوتة

الحلقة التانية) مليش دعوة أنا عايز الشعب بتاعي)

أحنا وصلنا لغاية فين .حد يفكرني أه أفتكرت كنا في دولة فسادنيا العظمي ووصلنا لحد ما الملك قفل السكة مع دلدول وطلب عقد إجتماع عاجل لبحث المشكلة. بتقولوا مشكلة أية لااا. بقولكم أية الي ناسي يراجع من الأول يالا بسرعة علشان نكمل الحدوتة.راجعتم شطار

المهم دخل الملك غرفة الأجتماعات وأنتظر ساعة أتنين تلاتة ومفيش لحد فيهم أثر.الملك أتوغوش والفار لعب في عبة فقعد يرنلهم واحد واحد.وهم يقفلوا عليه. لحد مدخل علية دلدول ونفسة مقطوع وعمال ينهج

الملك: خير يازفت الطين أية الي أخرك

دلدول: أسكت يامولاي.أسكت متعرف أية إلي حصل. البلد كلها فضيت علينا يامولاي

الملك: يا نهار أسود بتتكلم بجد

دلدول: وشرفي يامولاي ولابلاش وشرفك أنت ياسيد الناس زي مابقولك

الملك:لية وأزاي؟ طب وراحوا فين؟

!!!!
دلدول :علمي علمك يامولاي أنا بعد مكلمتني نزلت جري أدور علي الخدم والحرس ملقتهمش. قلت زي بعضة جريت علي الجراج ملقيتش السواقين قلت زي بعضة أسوق أنا دورت علي التشريفة والحرس الخصوصي ملقتش قلت زي بعضة برضك دة جلالة الملك عايزني . بدور العربية التسعة باب بتاعتي ولقيت الأربع عجلات نايمين . الشعب أبن المؤذية نيملي العجل قبل مايمشي . فخدتها كعابي لغاية هنا.وطول السكة أدور علي جنس بني أدم مش لاقي . ده حتي القطط والكلاب الضالة باينها طفشت هيا كمان.

.
يدخل في هذة الحظة باقي وزراء دولة فسادنيا العظمي وهم مقطوعي الأنفاس وإذ ماحدث لدلدول حدث لهم جميعا

الملك :يا نهار أسود ياولاد أية الي حصل دة. فين الشعب .هاتوالي الشعب .ملييش دعوة أنا عايز الشعب

وإذا بالملك ينخرط في نوبة من البكاء الحاد. ويحاول الوزراء تهدئة الملك

مهموز(وزير الداخلية): والله يامولاي معرف راحوا فين أنا قلتلك من الأول نحبسم كلهم.ونعمل توسعات في السجون أنت الي رفضت وقعدت تقول الحرية الحرية .بس أنا عندي ليك مفاجأة في حوالي تلاتة أربعه مليون أنا حابسهم وقافل عليهم كويس .عامل حساب ظرف زي دة.ممكن أجيبهملك يفكوا زنقه

الملك:تلاتة أربعة مليون يعملوا أية بس .وبعدين دول كلهم المعارضة.لا ياعم مليش دعوة أنا عايز الشعب بتاعي

مهزوز (وزير الأعلام): طيب أية رأيك يامولاي نبعت منادي يدور عليهم. أنا مش عارف هما هربوا لية بس دا أنا حتي في الفترة الأخيرة كنت مدلعهم أخر دلع وجايبله كليبات أية أخر مسخرة والأعلانات ملاينة بنات تهبل .دا حتي الأخباروالجرانين كلها بتتكلم عن عصر الرخاء الي أحنا عايشينة ومتمرمغين فية من ساعة مأنت حكمتنا من تلاتين سنة.والمسلسلات حاجة أية تفرح القلب الحزين ولافيها تفاهه ولا أسفاف ولاحاجة أبدا. أنا مش عارف كان مفروض نعملهم أية أكتر من كدة نشلهم علي حجرنا ونرضعهم

الملك(علي صرخة واحدة)مليييييييييييييش دعوة أنا عايز الشعب بتاعيييييييييييييييييييييي

هلفوت(وزير المالية) :طيب أنا عندي أقتراح حلو أحنا ننزل السوق نشتريلك شعب رخيص كدا وأبن حلال وعلي قد أدينا.ونشوف ملك مهاود كدا يرضي يبعلنا ولو نص شعبوه.والله يامولاي أنا مش عارف الشعب راح فين.دا أنا حتي في الأيام الأخيرة كنت محضرلهم شوية ضرايب أنما أية تستاهل بقك.كنت حخليهم يدفعوا ضرايب علي كل حالة وفاة بصفتها صدقة جارية علي المرحوم والي يعيش أكتر من تلاتين سنة يدفع بردة علشان ممتش من الجوع لحد دلوقتي.وكل ما تعيش أكتر فرصتك في الضرايب تكتر أما لووصلت لستين سنة تبدأ تحاسب بالثانية....أية رأيك.... بس ملهمش في الطيب نصيب حعملهم أية

الملك :منكم لله أنتم الي ضيعتم الشعب مني.مليش دعوووووووووووووووووووة أنا عايز شعبي

كندوز(وزير الزراعة والتموين): أنا يامولاي عندي الحل أحنا نقول أن أحنا نزلنا لحمة في الجمعية الكيلو بأتنين جنية. وحتلاقي الشعب عندك جري.أنا عارفة دة شعب همة علي باطنه.وميحبش حاجة في الدنيا قد اللحمة.دا أنا حتي كنت ناوي في الفترة الأخيرة نوقف زراعة خالص ونسيب الشعب الرزل دة يقرصة الجوع علشان يتعلم يشتكي كويس ويعرف أن الله حق وياكل الخضار أبو سماد ملوث وهو ساكت ويجيلة سرطان ونستريح منه

مصوص(وزير الصحة):أما والله شعب غريب يمكن طلعوا يتعالجوا بره.طب لية داأحنا حتي موفرين لهم كل الأمراض القديمة والجديدة من البهارسيا بتاعت الدودة الأسية.وإلي أنفلوانزا الطيور بتاعت ااكاك كاك.مرورا بجنون البقر والبشر والسلاحف كمان وكلة بالمجان.أنا متأكد يامولاي أنهم حيرجعولنا بسرعة لما يلا قوامحدش عارف يعالجهم من الأمراض المخصوصة بتاعتنا.وساعتها و ديني لوريهم وسيب عليهم الجمرة الخبيثة تظبطهم أنا شايل شوية في بطرمان مربي لوقت عوزه.

صعلوك (وزير التربية والتعليم):أما شعب متمرش فية لا التربية ولاالتعليم.مش كانوا قبل مايمشوا يستأذنوا.هو أحنا عمرنا رفضنالهم طلب.قالوا تعليم مجاني عملناه مجاني وعملنا كمان عادة و كبير ومخصوص وبالكبدة .قالوا جامعات فتحناها علي البحري.يلا خلي الشعب يتعلم صحيح العيال بياخدوا شهاداتهم يعلقوها في الحمام بس ومالة أهه برضة تطرد الناموس وتمنع الريحة.حنعملهم رأيه أكتر من كدة قولي يامولاي

.
كلبوظ(وزير السياحة):متقلقش يامولاي أنا متأكد أنهم راحوا يتفسحوا وراجعين تاني.أنت عارف أن الفلوس كترت في أيد الشعب.وأنا عارفه شعب صرماح.أول ما فلوسة تخلص حيرجع تاني

.
الملك(وقد أرهقه الصراخ والنواح): أشوف فيكم يوم يا شوية بقر . بقي أسيبلكم الشعب ساعتين زمن وأدخل أنام مأصحي ملقاهوش. أتصرفواااااااا.أنا مليش دعوة أنا عايز الشعب بتاعييييييييي

وأحتار الوزراء كيف يرضون الملك وقالوا في نفس واحد أنت ساكت لية يا دلدول متلحقنا يا أخي الملك بعجر حيروح مننا
دلدول:فيش حد يقدر يحل الموضوع دة غير واحد بس

الملك :مين ألحقنا بيه بسرعة

دلدول: الحكيم شحرور

الملك: لاااااااااااااااااااااااااااااااااااااااااااااا كلة إلا شحرور دة

ياتري من هو شحرور؟ ولماذا يكرهه الملك؟ وهل هو قادر فعلا علي حل اللغز؟

مقدرش أقول أنتم عارفيني سكتم بكتم.. علي العموم علشان خاطركم أنتم بس حكمل بس الحلقة الجاية
وتوتة توتة قفل علي الحدوتة

الحلقة الأولي) فين الشعب)

يحكي أنه في سالف العصر والأوان وفي أحد الدول النامية البعيدة وتدعي دولة فسادنيا العظمي كان هناك حاكم عادل يدعي الملك بعجر .كان يحكم بين شعبه بكل العدل والحب والحنان.وأحبه الشعب من كل قلبة .وهتفوا بأسمة وأحبوه وأحبوا أسرته ونادوابأبنه شنخر ملكا من بعدة.حتي كان ذلك اليوم أستقظ الملك من نومه نشيطا فرحا مبتهجا.مستعدا ليحكم الشعب بكل الحب والحنان والدلع .فإذا بة ينظر من نافذة قصره المنيف حتي يطالعه مشهدا غريبا.الشوارع خاوية الميدان أمام القصر خاوي السكون يعم المكان .نادي علي الخدم فلم يرد أحد .نادي علي الحرس فلم يرد أحد

الملك:هم راحوا فين ولاد الذين دول يا حسنين يامحمدين ياعوضين. لم يرد أحد

الملك:أية الحكاية أنامش عارف. لما أكلم الوزير دلدول أعرف منة

ترن ترن ترن ترن ترن تررررررررررررررررررررن

االملك بعجر:مبيردش لية الحيوان دة

الوزير دلدول:ألو أيوة يامولاي

الملك:مبتردش لية ياحلوف

الوزير: والله أفتكرتك بتديني مسد كول

الملك :(بكل غيظ)مش دة المهم دلوقتي المهم أني صحيت من النوم ملقيتش حد في القصرإلا الولية وأبنها.الخدم راحوا فين.فين الخدم.فين الحرس.فين الجناينية .فين الناس الي في الشوارع الي بيحبوني موت ونفسهم أحكمهم طول العمر

الوزير: أيه دة يامولاي هو أنت كمان

الملك: قصدك أية يابني جاموس

دلدول: أصل الحقيقة أن أنا برضة حصل معايا كدة في القصر بتاعي.بصراحة مش لاقي حد خالص.حتي الولية مش لاقيها.قمت من النوم بحسس علي السرير ملقتهاش جنبي .قلت الحمد الله ربنا خادها و لكن لما دورت كويس ملقتش جنس بني أدم في القصر كلة. قمت قلقت وكلمت الوزيرمهموز والوزير قزقوز والوزيركلبوظ ولقيت عندهم نفس المشكلة

الملك :يعني أية الموضوع دة.أسمع يافندي تجمعلي كل الوزرا وتكونوا كلكم عندي بعد نصف ساعة بالظبط ..مفهوم

دلدول: فهوم عظمتك

عايزين تعرفوا أية الي حصل في البلد الصغيرةالجميلة دي.

أنا مليش دعوة أنا قلت مش حكلم سكتم بكتم.علي كل حال مش حزعلكم الحلقة الجاية إنشاء الله قريبة بس بشرط تقولولي تفتكروا راح فين الشعب؟؟؟..وتوتة توتة سك علي الحدوتة