أمنعوا الضحك
ياجماعة اللي لية غرض يقرا الموضوع ده لا زم يقرا القصة الي قبلة الأول ..ولو قراها يبقي يستعد للنكد اللي جاي علشان أنا مليش مزاج تضحكوا النهاردة
إلا كل من عبرني ورد عليا في الموضوع اللي فات متشكر قوي ياجماعة بس أنا لا حظت شوية حاجات حقولكم عليها
الأولاني ..أن الموضوع عبارة عن شقيين الأول محدش جاب سرته خالص في التعليق وهو الكلام الي بنقوله وملوش أي معني وأن أحنا شعب عاطفي ومش عملي بالمرة..شفتم الراجل قعد يقوله أحنا بنشتري رجالة ويضغط علي أعصابة لغاية متشل وكان ممكن يقولة بكل بساطة يابني أحنا عايزين نعيش بنتنا في مستوي أنت متقدرش علية أو حتي روح يبني كون مستقبلك الأول وبعدين أبقي تعالي وكان سعاتها ريح وأستريح أنما نعمل أية شعب طيب قوي.
.بس من وجهة نظر أخري دي مش طيبة ولا حاجة ده ضحك علي الدقون ومسكنات لضمير الأب الي بيحب بنته وخايف عليها من البهدلة مش عايز يحس أنه رفض الولد علشان الفلوس وعمال يقول لنفسة قبل مايقول للولد أحنا بنشتري رجالة أحنا ميهمناش الفلوس ومش عايز يعترف أن الفلوس مهمه ومهمه جدا كمان بالنسبه له ويمكن بالنسبه للناس كلها.
التاني..أنكم ظلمتم الشاب المسكين وطلبتوا منه يصوم الدهر كله ..أنا عارف أن ده حديث الرسول علية الصلاة والسلام الذي لاينطق عن الهوي..بس برضه ده رسول الرحمة الذي كان يزوج الناس بصاع من تمر وأنا شايف أن الي بيحصل دة ميرضيهوش أبدا...إزاي نطالب الشاب بصيام الدهر وحنا حطين قدام عنيه المحرمات ليل نهار و مسهلين الحرام جدا ومصعبين الحلال جدا جدا..وبنقوله علشان تتجوز قدامك كذا حل
تسافر الخليج تشتغل في السخرة سنين طويلة تضيع زهرة شبابك في الذل والغربة وترجع تتجوز أي واحدة والسلام وسيبك م الحب والمسخرة والكلام الفارغ
تصوم الدهر كله و تترهبن ومتتوقعش تفك صيامك أبدا وأنتظر الحور العين في الأخرة (اللهم أمين
أنت لية مصدع نفسك يابني (دة الشيطان اللي بيتكلم) ماالزنا واللعب بالديل والفيديو كليب قدامك طول النهار واليل ولا أنت غاوي وجع قلب
أنا شايف الأب مظلوم لأنه بيحب بنته وخايف عليها من البهدلة
وشايف الشاب مظلوم لأنة مش لاقي وسائل الحياة الكريمة الي يعف بيها نفسة
لكن شايف المجتمع مخطأ وخطأ لايغتفر...إلا تفعلوه تكن فتنة في الأرض وفساد كبير
الشاب المفروس المتغاظ منكم
سكتم بكتم
20 comments:
ولا تتغاظ و تكتم فى قلبك علشان كدا هتنفجر قريب
وزى ما انت قلت الاتنين مظلومين الاب اللى مش عايز بنته تتبهدل
و الشاب اللى لسه فى مقتبل حياته
و يا سيدى مش لازم تتجوز اول ما تتخرج اشتغلك بتاع عشر سنين كدا صووم فيهم و ان شاء الله تكون حوشت فلوس ما انت صايم باه و ساعتها رووح اتقدم بقلب جاامد
و على فكرة فيه ابهات كتير بيساعدو الشاب علشان خايفين على بناتهم من تاخر الزواج
و ربنا يكرم و متزعلش مننا
السلام عليكم
أنا شايف أنكم ظلمتم البنت ومحدش جاب سيرتها
وهي ممكن توافق أنها تعيش في أي مستوي كان مادام الشاب بيعرف ربنا
يعني هي هتكون أدري بحالها لأنها أنسان لها مشاعر وأحاسيس ولا تريد ان تعيش وحيدة عشان الفلوس مثلاً
لا أنكر أهمية هذه النقاط الأجتماعية ولكنها تتضاءل بجانب العوامل النفسية الأخري
وأعرف عشرات القصص التي تسبب فيها تعنت الأباء في تعاسة الأبناء
بل وأن من يملك المال في أحيان كثيرة يجهل معني الزوج ومعني الزوجة
وهذا رأيي
لالالالا بعد الشر عليك من الغيظ مش كده اصلك لسه هتصدم ياما
هههههه
للاسف الاب جاله شلل من قلة دينه وعدم ايمانه وليس لانه مش عايز بنته تتبهدل والله الواحد يعرف ناس كان معاهم فلوس كتيرة اوووى وللاسف اول ما هى دخلت بيته قاعد دلوقتى على الحديدة ربنا يرحمنا من عنده
هما صومواك الدهر هههههههههه
طب والله كويس
انا اللى استغربت من رد الشباب اللى مش عايز يدافع عن قضيته وحقه فى تكوين اسرة لانهم من جوا فاضيين وانا اللى اعرفه حاجة واحدة اللى بيطلب الحلال اكيد ربنا بيسهله قدامه وياما ناس قعدت تحوش علشان يقدر يفتح بيت للاسف العمر اخذه وعدى الاربعين لانه لسه ماجابش الباقى من الكماليات اللى فيها صراع بين الدول المتقدمة على تصنعيها واحنا بسم الله مشاء الله علينا نشتريها وقال ايه اسياسيات
معنديش كلام تانى الا ان نقتدى برسولنا الكريم عليه افضل الصلاة والسلام وكلام الباشمهندس بينو
وفى حديث عن الرسول للاسف مش فاكرها وعايزة وقت علشان ادور عليه تقريبا هو الزمن ده بتاعنا اللى الزنا يكون فيها ارخص من الزواج يا لها من كارثة واللى يعرف الحديث ياريت يقولها
ولا نملك الا الدعاء
اللهم انى اسالك الهدى والعفة والعفاف والغنى والتقى يااااااارب امين
اللهم اعف بنات وشباب المسلمين ياااااااارب امين
كل مرة اعمل بوست جديده
معلش بقى كل مرة اطول على حضرتك
والله الاتنين مظلومين
الشاب عاوز الحلال وزي مايقولوا داخل الباب من بيته
والاب عاوز يتطمن علي بنته
الاتنين المجتمع ظالمهم
صعب تطلع حد فيهم مظلوم
السلام عليكم ورحمة الله وبركاته
للاسف دي مشكلة المجتمع كله
الابهات عاوزين مستوي معيشي معين لبناتهم
والشباب مش قادرين انهم يحققوا ده ، والشغل صعب وكسب فلوس زياده اصعب
و عمالين نلف في دايره مغلقه مافيش منها خروج
بس مش معني كده ان الشباب يقعدوا ويحطوا ايديهم علي خدهم ، لا لازم يحاولوا مره واتنين و تلاته
وربنا لا يضيع اجر من احسن عملا
وان شاء الله هيحلها من عنده
السلام عليكم
يا عم انت متغاظ ليه ما كل واحد بيشوف المواضيع من منظوره
وعلى العموم احنا ميخلصناش انك تكون متغاظ
من ناحيه الكلام اللى ملوش معنى
سيدنا محمد عليه الصلاه والسلام قال الكلمه الطيبه صدقه
يعنى الراجل يقول للواد انت ما تلزمش عشان الواد تجيله سكته قلبيه يطب ساكت طب ده كلام
وبعدين لا ميصومش الدهر كله يصوم ربعه
وبعدين يتوكل على الله ويتقيه وربنا حيرزقه من حيث لا يحتسب
وكل حاجه وليها معاد
بس اوعى بس انت تزعل نفسك
موضوع جامد يا سكتم
فعلا الشاب ولا الاب ولا البنت
مين المظلوم ومين ظالم مين
بس انا مع امانى فى ان البنت ممكن توافق على الشاب ده لانه عارف ربنا وبدام تقى الله يبقى اكيد هيتقى الله فيها وده المهم
والاب عنده حق انه يخاف على بنته بس لنفس السبب ممكن يوافق على الجوازه دى
وبالنسبه للشاب يبقى على الاقل عنده اوضه وصاله عشان ميبهدلش الشابه دى معاه
تحياتى ليك
لعلمك انا مركز من كلامك ع النقطة الأولى بس موضوع الجواز ده قسمة ونصيب :)
اما بقة
اتفضل كل وفي ايدك سندوتش واحد
مش حنختلف وفي الآخر نختلف
خليها علينا خالص
بكام يا عم؟... ببلاش ويرفض ينزل نص جنيه
عيني ليك ويطلع عينيك
اتفضل صلي بينا إمام وهو تقدم خلاص
حبيب قلبي نور عيني وأول ما تمشي يتكلم عليك
الخ
وعجبي
I guess parents always want the best for thier kids but sometimes parent tend to over protect them thinking that they are made of glass but they are not they are strong they just need a chance to show that..
3ala fekra eih 7ekayet el2asrar ma3ak??
و الله يا صكطم يا بقطم انا مش عارف اقلك ايه
انا قريت البوست اللى فات بس ابتسمت و مالحقتش اضحك لانى قريت البوست ده
اقلك ان انا لو علقت ع البوست اللى فات هاعتبره مجرد كلام واحد متغاظ زى ملايين المتغاظين فى المحروقة
لكن يا عزيزى انت فى البوست ده طلعت كل الناس مظلومة
اقلك لو ابو البنت دى عايز يعفها حقيقى كان اتساهل شوية
الرسول صلى الله عليه و سلم قال
ان جاءكم من ترضون دينه و خلقه فزوجوه و ان لم تفعلوا تكن فتنة فى الارض و فساد كبير
عزيزى
انا ما بقولش انهم يبنوا بيتهم طوبة فضة و طوبة دهب و كفاحهم المشترك و الحاجات الهبلة دى لكن برضه باقول لما بسلامتها بتقعد ع الطبلية فى بيت اهلها ما تتطلبش سفرة 12 فرد
و لما هى بتغسل فى طشت ما تتطلبش فول اوتوماتيك 7 كيلو
و الا انا مجنون؟
موضوع الجواز دة شاغل تفكيرك خالص يا باشا
انا بيتهيا لي ان الشباب هو دلوقتي اللي مش طالبة معاه جواز...
ياعم اذا كان الحياة وهو عازب مش سالكة اومال لما يتجوز هيعمل ايه؟
هي ناقصة
تحياتي ليك
و الله يا اخ سكتم بكتم كلهم غلطانين هو الراجل نفسه يتجوز صحيح و لكن في نفس الوقت ميروحش يتجوز و هو مش لاقي ياكل و لا لاقي يسكن اصلا و يبهدل بنات الناس معاه اهل البنت من حقهم انهم يشوفوا بنتهم عايشة كويس لكن في نفس الوقت اهل البنت بردو غلطانين لانهم مش لازم يغالوا في مطالبهم اوي لانهم عارفين حال الشباب عامل ازاي...يعني لو جيت تبص للموضوع هتلاقي ان كلهم غلطانين و مش غلطانين في نفس الوقت و متسألنيش ازاي نحل المشكلة ديه..تحياتي للموضوع الجميل ده..سلام
بصى الاثنين مظلومين
الاب عايز ابن مناسب لابنته والشاب يريد زرجه مناسبه لامكانياته
ربنا معاهم ويخلصنا بقه من الفتره دى
انا مش عارفه انتي بنت ولا ولد بس انا جيت هنا بالصدفه ومش مصدقه نفسي مين يا بنتي اللي بياخد 147 جنيه انتي اسكندرنيه ولا ايه ؟؟
وبعدين دا بتاع العيش مرتبو 400 جنيه يعني اسعي يا عبد
ومين بقا ان شاء الله الي اهله ما بيسعدهوش في الزمن ده و محدش جاب سيرت اسكان بابا مبارك والشقق الي بمقدم بسيط في الاماكن الشعبيه \وعلى قد لحافك مد ايههههههههه
و حياة ابوك يا شيخ ماتفكرنا و سيبنا بهمنا
و قال يعني بنضحك
البوست اللي فات ماكانش بيوحي بكدة خالص .. اللي فهمناه هو إن فيه شاب مستهتر ورايح سايق الإستهبال ولا يستحق أي تعاطف معاه
أما موضوع تزويج بناتنا من الفقراء المعدمين فده موضوع كبير لا يمكن الموافقة عليه على إطلاقه كده ولكن فيه شروط كتيرة .. منها وليس كلها إن العريس يكون ذو دين ويتوسم بالمسؤلية والحرص على السعي والعمل والجد لتحسين الأحوال .. مع ملاحظة أن عليك السعي فقط وليس عليك الرزق .. فالرزق من عند الله سبحانه وتعالى
والله تعالى أعلم
السلام عليكم
ايه يا عم سكتم
ايه قررت السكوت بعد منع الضحك
ممممممم
:D
والله مش لوحدك اللى متغاظ
عايزة اقولك ان حال المايل ده مأثر على الكل
مأثر على الشاب اللى مش عارف يعف نفسه وحالته بقت صعبة جدا
والبنت اللى قطر الجواز بيفوتها وقاعدة تغنى ظلاموه
والأب اللى نفسه يفرح بيها ومش عارف يعمل ايه
وكل ده زى ما قلت عشان بعدنا عن الصح
إذا جآكم من ترضون دينه وخلقه فزوجوه إلا تفعلوا تكن فتنة فى الارض وفساد كبير
واحنا دلوقتى عايشين فى زمن الفتنة والفساد الكبير
والفرسة والغيظة الكبيرة بردو
كذا بنت اعرفها عمالة ترفض هى وأهلها فى إنتظار الأحسن
والاحسن
والاحسن
لحد ما جه الوقت اللى البنت ووالدها عمالين يقوله فيه يا ريتنا
ماتضايقش نفسك ومتحملهاش اكبر من طاقتها وتوكل على الله ومتعرفش الخير والنصيب فين
ربنا يسترها معانا ومع الجميع ويخرجنا من الدنيا دى على خير
اللهم امين
بص يا عم الحل موجود في اسمك " سكتم بكتم " كل واحد يعمل عبيط ويعدي الموضع كده من غير كلام يعني مفيش حل اصلا
اذا الحل ان كل واحد يظبط حاله على قد ظروفه يعني ياخد واحده ظروفها قريبه من ظروفه وفي نفس الوقت تكون مستعده تضحي شويه انما انا اروح لواحده ابوها بيديها مصروف ضعف مرتبي واقوله انا ناوي اسعدها طيب هو يصدقك ازاي وهي هتستحمل ازاي
كل واحد متعود على حياته يعني بيتعب قوي لو نقص منها جزء بسيط تخيل لو نقص منها جزء كبير جدا
انا شايف ان كل واحد لو دور في المستوى اللي يناسبه هيلاقي الإنسانه اللي تناسبه وسامحوني على اني واقعي كده اخر مره يا عم الحاج
بس سيبك انت لو معجبكش النظام ده عندي ليك سهره في حتة جامد خمارة بحري وهتكحرت يا مان
وسلملي على هايفا ونانسي واليسا
سلااااااااااااااااااااااام
انته عارف ..انا كنت هااعلق عالبوست اللى قبليه ..بس حاجة قالتللى لاه
بالنسبة للبوست ده ..
الراجل زى ما انته بتقول كان بيقول احنا بنشترى رجالة علشان يريح ضميره وانه كان ممكن يقولله احنا عايزيين نعيش بنتنا فى مستوى مرتاح وبتاع ..
برضه هادخل عالفكرة اللى عاوزه ااقوللها اهو ..
ااقوللك فكرة خبيثة ..بس مش عارفه هاتوصللك ولا لاه ..انى يعنى هااقدر اوصلهالك ولا لاه ..
الفكرة الخبيثة هىّ ان الابهات اللى من النوع ده بتقول عاوزين عريس حلو وغنى علشان لو البنت مش ارتاحت مع طباعه ترتاح مع فلوسه والنغنغة اللى هاتعيش فيها ..
كلنا عارفين فكرة النغنغة ..بس فكرة البديل ..يعنى اهى حاجة تنفعك فلوسه لان الطباع والاخلاق مش مضمونة والبنى ادم زى البطيخة ياتبقى قرعة ياتبقى بشعر_ايع ايه بطيخة بشعر ديه _ المهم
فكر معايا فى فكرة البديل وهوه لسه طالب ايديها ..الفكرة الخبيثة اللى فى عقول الاهالى والبنات كمان اللى بيفكروا كده وبيبقوا مستعدين تماما انهم يبدلوا الاخلاق والعقل بالنغنعة
وهما لسسسسسسسسسسسسه عالبر
Post a Comment